Çmimet e naftës rriten për të pestën herë radhazi – Tensionet në Lindjen e Mesme mbështetin rritjen

Kristi Ceta / SCAN

 

Çmimet e naftës u rritën për të pestën herë radhazi, duke zgjeruar fitimet nga rritja me më shumë se 3% e javës së kaluar, ndërsa frika e recesionit në SHBA u lehtësua. Një ndikim të madh kanë pasur edhe tensionet gjeopolitike që vijojnë të shtohen në Lindjen e Mesme.

Kontratat e së ardhmes së naftës së papërpunuar Brent u rritën me 28 cent, ose 0,4%, në 79,94 dollarë për fuçi, ndërsa çmimet e naftës së papërpunuar të Teksasit Perëndimor të SHBA u rritën me 42 cent, ose 0,6%, në 77,26 dollarë.

Sipas analistëve, mbështetja vjen nga të dhënat më të mira se sa pritej të javës së kaluar në SHBA, të cilat lehtësuan frikën për një recesion të mundshëm. Ekziston gjithashtu një ankth i madh se kur Irani mund të kërkojë hakmarrje për vrasjen e liderëve kyç të Hamasit dhe Hezbollahut.

Përveç kësaj, inkursioni izraelit në Gaza u intensifikua të shtunën me një sulm ajror në një kompleks shkolle që vrau të paktën 90 njerëz, sipas Shërbimit të Emergjencave Civile të Gazës, megjithëse Izraeli kundërshtoi vërtetësinë e numrit të viktimave. Hamasi hodhi dyshime mbi pjesëmarrjen në bisedimet e reja të armëpushimit të dielën.

Brent përfundoi javën e kaluar me 3.7% në javë, ndërsa Teksasi Perëndimor fitoi 4.5%, në bazë të të dhënave mbështetëse ekonomike dhe rritjes së shpresave për një ulje të normës së interesit në SHBA.

Tre bankierë qendrorë të SHBA-së thanë javën e kaluar se inflacioni dukej se po qetësohej mjaftueshëm që Rezerva Federale të ulte normat e interesit në muajin e ardhshëm.

Çmimet e konsumit në Kinë u rritën më shpejt se sa pritej në korrik dhe pretendimet javore të papunësisë në SHBA ranë më shumë se sa pritej javën e kaluar.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.