Covid-19 në Kinë rrëzon naftën – Vendosja e kufizimeve pritet të dëmtojë kërkesën  

Nafta po qëndron në rënie të lehtë në sesionin e sotëm, për shkak të përkeqësimit të situatës së Covid-19 në Kinë, pasi autoritetet kanë raportuar edhe 19 vatra të reja. Vendosja e kufizimeve të ashpra pritet të dëmtojë kërkesën nga ekonomia e dytë me e madhe në botë.

Nafta Brent e Londrës po tregtohet lehtë mbi nivelin e 97 dollarëve për fuçi, ndërsa nafta Bruto amerikane po tregtohet në rreth 91 dollarë për fuçi. Në sesionin e kaluar, të dy bençmarkët prekën nivelin më të lartë që nga gushti i këtij viti, për shkak të raportimeve se autoritetet në Kinë do të lehtësojnë kufizimet kundër përhapjes së Covid-19.

Por, më pas zyrtarët kinezë rikonfirmuan angazhimin për të vijuar me politikën zero-Covid. Analistët shprehin shqetësimin për tkurrjen e furnizimit të tregut, pasi duke filluar nga 5 dhjetori Bashkimi Evropian do të vendosë embargo të plotë ndaj naftës bruto që importohet nga Rusia.

Ndërsa duke filluar nga shkurti i vitit të ardhshëm do të ndalohen edhe nënproduktet e naftës. Investitorët po presin edhe të dhënat mbi rezervat e naftës që do të publikohen gjatë kësaj jave në SHBA.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.