Çudia greke me çmimet e ushqimeve vendase – Eurostat: Rritje disproporcionale e tyre, pavarësisht uljes së inflacionit

Shifrat e Eurostat tregojnë inflacion më të ulët të ushqimeve në Greqi sesa mesatarja europiane, por rritje më të larta të çmimeve të ushqimeve të cilat vendi i prodhon vetë në sasi të mjaftueshme.

Probleme të tilla si madhësia jo e mjaftueshme e tregut, varësia e madhe nga materialet parësore dhe dytësore të importuara, madje edhe marrëdhëniet transaksionale midis prodhuesve, furnitorëve dhe shitësve me pakicë, luajnë rolin e tyre.

Sipas të dhënave të Eurostat, çmimet e ushqimeve në Greqi në dhjetor 2022 u rritën me 15.6% me bazë vjetore, nën mesataren në Bashkimin Europian prej 18.2% dhe nën vendet e pasura si Gjermania, por edhe vende me karakteristika të ngjashme me Greqinë, si p.sh. si Portugalia.

Fillimisht, vihet re se deri në qershor 2022 inflacioni i ushqimeve në Greqi ishte më i lartë se mesatarja europiane. Fakti që Greqia ka pasur inflacion ushqimor dyshifror dhe vazhdimisht në rritje që nga prilli, nuk është inkurajues, veçanërisht në një vend ku fuqia blerëse e konsumatorëve është ndër më të ulëtat në Bashkimin Europian.

Nga të dhënat e Eurostat-it dhe krahasimi i ndryshimeve të çmimeve të produkteve ushqimore bazë gjatë vitit të kaluar, dalin ndryshime të larta çmimesh, më të larta se mesatarja europiane në produktet në të cilat Greqia prodhon vetë mjaftueshëm.

Shembull tipik është kosi, çmimi i të cilit është rritur me 26.6% në Greqi në 12 muajt e fundit, krahasuar me një rritje prej 23.6% në BE. Për më tepër, të dhënat e Ministrisë së Zhvillimit treguan më 20 dhjetor se 200 gram kos me qumësht lope shitet për 1.30 euro në Greqi kundrejt 0.90 euro në Spanjë dhe 1 euro në Portugali.

Gjithashtu, sipas Eurostat, mishi i qengjit, deles dhe dhisë janë shtrenjtuar më shumë në Greqi se në vendet e tjera të Europës Jugore, konkretisht me 10.10%.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.