Dollari dobësohet lehtë – Tregjet presin dëshminë e Powell në kongresin amerikan

Dollari amerikan është dobësuar lehtë edhe në sesionin e sotëm, pasi investitorët po presin dëshminë e shefit të Rezervës Federale, Jerome Powell në kongresin amerikan, për të mësuar më shumë në lidhje me të ardhmen e normave të interesit. Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 104.3, ndërsa në sesionin e kaluar ra me 0.3%.

Gjatë javës së parë të marsit, ky indeks ka rënë me rreth 0.6%, ndërsa gjatë shkurtit u rrit me 2.6%. Euro po tregtohet në rreth 1.067 dollarë, pas fitimeve me rreth 0.5% në sesionin e kaluar. Të martën dhe të mërkurën, shefi i Rezervës Federale, Jerome Powell, do të dëshmojë përpara kongresit amerikan, ndërsa të premten do të publikohet raporti mbi punësimin në SHBA për shkurtin.

Analistët vlerësojnë 76% mundësi që banka qendrore amerikane të rrisë normën bazë të interesit me 25 pikë bazë, në takimin e 21 dhe 22 marsit, por nuk përjashtohet edhe mundësia për një rritje me 50 pikë bazë. Në tregun e kriptomonedhave, bitcoin po tregtohet i qëndrueshëm në rreth 22,400 dollarë, ndërsa ethereum po tregtohet në rreth 1570 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.