Dollari, humbjet e para javore për qershorin – Euro mbështetet nga aktiviteti i dobët i fabrikave në Europë
Dollari amerikan po qëndron në rënie në sesionin e fundit të kësaj jave, përballë monedhave kryesore ndërkombëtare dhe pritet të publikojë humbjet e para javore për këtë muaj. Investitorët po llogarisin rrugën që do të ndjekë Rezerva Federale me rritjen e interesave, për të mbajtur nën kontroll inflacionin.
Indeksi që mat ecurinë e dollarit amerikan përballë monedhave kryesore ndërkombëtare po qëndron në rreth 104.3, ndërsa në sesionin e kaluar u rrit me 0.19%.
Ndërkohë, monedha europiane po mbështetet nga pritshmëritë se Banka Qendrore Europiane do të shtrëngojë me shpejtësi politikat monetare, pasi të dhënat e publikuara treguan një dobësim të aktivitetit të fabrikave në Europë.
Gjithsesi, volumi i shkëmbimeve tregtare ka qënë i ulët gjatë kësaj jave, me investitorët që po vendosin baste për një politikë monetare të kujdesshme nga Rezerva Federale, e cila në takimin e korrikut pritet të rrisë normën bazë të interesit me 75 pikë bazë.
Ndërkohë, në ditën e dytë të dëshmisë së tij në Kongresin amerikan, presidenti i Rezervës Federale, Jerome Poëell, deklaroi se banka qëndrore është jashtëzakonisht e vendosur për të ulur inflacionin pranë objektivit, pavarësisht rreziqeve për ngadalësimin e ekonomisë.
Në tregun e kriptomonedhave, bictcoin vijon të tregtohet në mbi 20 mijë dollarë, ndërsa ethereum po tregtohet në rreth 1130 dollarë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.