Dollari konsolidohet në nivelin më të lartë 20-vjeçar – Ndërhyrja e autoriteteve në Japoni rrëzon jenin, priten disa të dhëna ekonomike
Dollari amerikan vijon të qëndrojë në nivelin më të lartë në 20 vitet e fundit përballë monedhave kryesore ndërkombëtare, por bie në sy forcimi i jenit japonez, pas ndërhyrjes së autoriteteve në vend në tregjet e këmbimit valutor, që ishte ndërhyrja e parë që nga viti 1998.
Lëvizja erdhi pas vendimit të Bankës së Japonisë për të mbajtur të pandryshuara normat e interesit, vendimi i cili e rrëzoi jenin deri në 145 përballë dollarit. Në anën tjetër, paundi britanik vijon të qëndrojë në nivelin më të ulët në 37 vitet e fundit në raport me monedhën e gjelbër, në rreth 1.1270, pasi Banka e Anglisë vendosi të rrisë normën bazë të interesit me 0.5 pikë përqindje.
Edhe euro po qëndron në nivelin më të ulët në 2 dekadat e fundit. Indeksi që mat ecurinë e dollarit amerikan, përballë gjashtë monedhave kryesore ndërkombëtare po qëndron në mbi 111, niveli më i lartë që nga viti 2002.
Investitorët po presin edhe të dhënat mbi Indeksin PMI për eurozonën, Mbretërinë e Bashkuar dhe Shtetet e Bashkuara të Amerikës. Në tregun e kriptomonedhave, bitcoin po tregtohet në mbi 19 mijë dollarë, ndërsa ethereum po tregtohet në rreth 1340 dollarë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.