Dollari, në nivelin më të lartë në 1 muaj – Investitorët presin të dhënat mbi inflacionin në SHBA

Dollari amerikan po ndryshon minimalisht gjatë sesionit të sotëm dhe po tregtohet në nivelin më të lartë në 1 muaj, përballë shportës me 6 monedhat kryesore ndërkombëtare. Investitorët po tregtohen të kujdesshëm, në pritje të të dhënave mbi inflacionin në SHBA, që do të japin një panoramë më të qartë mbi ecurinë e çmimeve.

Ndërkohë, presidenti i Rezervës Federale të Nju Jorkut, John Williams, deklaroi se norma bazë e interesit në intervalin nga 5% deri në 5.25% është shumë e arsyeshme. Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 103.4, niveli më i lartë në 1 muaj. Ndërkohë, më herët, gjatë një sesioni me pyetje-përgjigje në Klubin Ekonomik në Uashington, shefi i Rezervës Federale, Jerome Powell tha se normat e interesit mund të rriten më tej, nëse kushtet ekonomike do të jetë të favorshme.

Pas këtyre deklaratave dollari pati një tendencë në rënie përballë monedhave kryesore ndërkombëtare. Megjithatë, si euro ashtu edhe paundi britanik po qëndrojnë në nivelin më të ulët në 1 muaj, përballë monedhës së gjelbër. Sipas analistëve, Powell nuk tha ndonjë detaj që nuk dihej dhe dështoi të japë indikacione në lidhje me ecurinë e inflacionit në të ardhmen.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.