Dollari, në nivelin më të lartë në 7 javë – Politikëbërësit e FED mbështesin norma të larta, për një kohë të gjatë
Euro është rritur lehtë në sesionin e sotëm, pas humbjeve të realizuara një ditë më parë, menjëherë pas publikimit të procesverbalit të takimit të fundit të Rezervës Federale në SHBA, sipas të cilit politikëbërësit e bankës qendrore janë pro normave të larta të interesit për një kohë të gjatë. Në anën tjetër, thuajse të gjithë politikëbërësit e Rezervës Federale favorizojnë një ngadalësim të rritjes së normave të interesit në takimet në vijim.
Megjithatë, në dokument thuhet se ecuria e inflacionit do të jetë faktori kyç që do të përcaktojë normat e interesit. Në sesionin e kaluar, euro zbriti drejt 1.06 dollarëve, ndërsa në sesionin e sotëm po rikuperon një pjesë të vogël të këtyre humbjeve. Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 104.5, niveli më i lartë në 7 javët e fundit.
Në rajonin aziatik, jeni japonez u rimëkëmb lehtë, ndërsa investitorët po presin fjalimin që do të mbajë guvernatori i ardhshëm i Bankës së Japonisë, Kazuo Ueda. Ai do të flasë në parlament të premten dhe të hënën dhe pritet të ofrojë detaje në lidhje me politikat monetare. Në tregun e kriptomonedhave, bitcoin po tregtohet në rreth 24,300 dollarë, ndërsa ethereum po tregtohet në rreth 1670 dollarë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.