Dollari, në nivelin më të ulët në 1 muaj – FED pritet të ngadalësojë hapin e rritjes së normave të interesit
Dollari po qëndron në rënie në sesionin e sotëm, duke prekur nivelin më të ulët në 1 muaj, përballë monedhave kryesore ndërkombëtare. Tregtarët kanë ulur pritshmëritë për rritjen e interesave nga Rezerva Federale për shkak të shenjave se banka qëndrore më e madhe në botë mund të ngadalësojë hapin e rritjes së interesave. Indeksi që mat ecurinë e dollarit amerikan ka rënë në 101.4, niveli më i ulët që nga 25 prilli.
Gjithashtu, edhe rritja e tregjeve aziatike dhe atyre amerikane ka ulur kërkesën për monedhën amerikane. Edhe në raport me euron, dollari ka prekur nivelin më të ulët që nga 25 prilli, në 1.0765. Gjatë kësaj jave, ndërkohë, indeksi i dollarit amerikan është në rënie me rreth 1.5%, duke zgjeruar humbjet prej 1.37% të javës së kaluar.
Në mes të këtij muaji, dollari preku nivelin më të lartë në dy dekadat e fundit, pranë 105 përballë 6 monedhave kryesore ndërkombëtare, por më pas nisi një seri tërheqjeje për shkak të shenjave për ngadalësimin e ekonomisë globale.
Në tregun e kriptovalutave, oreksi i investitorëve për asete me risk nuk e ka ndihmuar bitcoinin që të rritet. Madje, kriptomonedha më e madhe në botë ra me rreth 2%, në rreth 29 mijë dollarë. Ethereum po tregtohet në rreth 1760 dollarë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.