Dollari ngjitet në nivelin më të lartë në 2 dekada – Mbështetet nga tensionet gjeopolitike dhe nga politika shtrënguese e FED
Dollari amerikan ka vijuar tendencën në rritje edhe në sesionin e sotëm dhe po mbështetet nga pritshmëritë se Rezerva Federale do të rrisë normat e interesit në takimin e radhës, nga ngadalësimi i ekonomisë dhe tensionet gjeopolitike.
Të dhënat pozitive mbi punësimin në SHBA kanë shtuar pritshmëritë se banka qëndrore amerikane do të shtrëngojë sërish politikën monetare për të luftuar inflacionin e lartë. Deri në vitin 2023, analistët parashikojnë se normat e interesit do të jenë në nivelin më të lartë në disa dekada.
Përsa i përket tensioneve gjeopolitike, Rusia ka vijuar sulmet me raketa në qytetet e Ukrainës edhe ditën e hënë, në shenjë hakmarrje ndaj rrëzimit të urës në Krime, që u aneksua nga Rusia në vitin 2014.
Indeksi që mat ecurinë e dollarit amerikan përballë gjashtë monedhave kryesore ndërkombëtare po qëndron në mbi 113, niveli më i lartë në 20 vitet e fundit. Në tregun e kriptomonedhave, bitcoin po tregtohet në rreth 19 mijë dollarë, ndërsa ethereum po tregtohet në rreth 1280 dollarë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.