Dollari rritet me rreth 1%, rikuperon humbjet – Mbështetet nga pritshmëritë se FED do të rrisë agresivisht interesat
Dollari amerikan i është rikthyer fitimeve në sesionin e sotëm, pasi investitorët vijojnë të besojnë se Rezerva Federale do të mbajë një qëndrim agresiv me rritjen e interesave.
Për rrjedhojë, euro dhe paundi kanë humbur rreth 1% të vlerës.
Monedha britanike i është afruar më shumë nivelit të 1.13 dollarëve, duke i dhënë fund gjashtë sesioneve me radhë në rritje.
Kryeministrja e Mbretërisë së Bashkuar, Liz Truss, premtoi se do të ulë nivelin e borxhit, pavarësisht planit për të ulur taksat dhe mbështetur investimet.
Presioni mbi paundin u shtua edhe më tej pasi sektori privat në Britani njohu kontraktimin më të madh që nga periudha e pandemisë.
Referuar të dhënave të tjera, një raport në SHBA tregoi se punësimi në sektorin privat u rrit me 208 mijë njësi, kundrejt parashikimeve për një rritje me 200 mijë njësi.
Megjithatë, investitorët po presin të dhënat zyrtare që do të publikohen të premten nga Departamenti i Punës.
Në tregun e kriptomonedhave, bitcoin po tregtohet pranë 20 mijë dollarëve, ndërsa ethereum po tregtohet në rreth 1360 dollarë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.