Drutë e zjarrit, përjashtim nga TVSH-ja – Pr.ligji: Mbrojtje dhe mbështetje e individëve në kushtet e krizës energjetike

Përjashtim nga TVSH-ja në import dhe furnizim i druve të zjarrit për ngrohje për vitin 2023”. Rritja e çmimeve të këtij burimi energjie duket se ka detyruar qeverinë të kërkojë lehtësime në taksa, duke ndërhyrë në ligjin ”Për tatimin mbi vlerën e shtuar”. Sipas relacionit që shoqëron projektligjin, qëllimi i këtij propozimi është mbrojtja dhe mbështetja e individëve në kushtet e krizës energjitike.

Sipas dokumentit, të siguruar nga TV SCAN drutë e zjarrit të destinuara për ngrohje janë një zëvëndësues i afërt i ngrohjes me energji elektike. Për këtë qëllim, këta artikuj propozohet të jenë pa TVSH si në import ashtu dhe brenda vendit, duke mos rënduar konsumatorin final. Sipas të dhënave nga Drejtoria e Përgjithshme e Doganave, rezulton se TVSH e paguar në import për tre vitet e fundit është rreth 7 mln në vit. Sa i takon masës së TVSH-së, eksporti trajtohet me TVSH-në 0, ndërkohë që shitja brenda vendit apo importi trajtohet shkallë normale të TVSH-së, 20%.

“Në këto kushte propozohet që furnizimi brenda vendit dhe në import i artikujve të përfshira në kreun 4401 të Nomenklaturës së Mallrave, që kanë si qëllim përdorimin për ngrohje, për vitin 2023 të jenë të përjashtuara nga TVSH- ja.

Referuar nomenklaturës të mallrave, kreu që propozohet të përjashtohet nga TVSH-ja përfshin drurin si lëndë djegëse, në kërcunj, kopaçe, degë, shkarpa apo në forma te ngjashme; druri në ashkla apo në copa si dhe tallashi, mbetje dhe kthime te drurit, nëse janë apo jo të aglomeruar në briketa, sfera apo në forma të ngjashme.

Ndërkaq, relacioni i projektligjit specifikon se në këtë fazë, efekti i parashikuar në buxhetin e shtetit nuk mund të matet.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.