Ekonomia gjermane, e “paralizuar” – Instituti Ifo nuk parashikon rritje, rreziku i recesionit mbetet i lartë

Kristi Ceta/ SCAN

Ekonomia e Gjermanisë ka të ngjarë të ngecë këtë vit, tha instituti Ifo, duke ndryshuar parashikimin e mëparshëm për rritje prej 0.4%. “Ajo ka ngecur dhe rrezikon të mbetet e ngrirë, ndërsa shtetet e tjera po ndiejnë rritje,” tha kreu i kërkimit të Ifo-s, Timo Wollmershaeuser.

Ekonomia vendase u tkurr në tremujorin e dytë, duke shkaktuar frikën e një recesioni tjetër. Një recesion përkufizohet si dy tremujorë radhazi të tkurrjes ekonomike. I pyetur nëse ai pret një recesion, Wollmershaeuser tha se e shmang qëllimisht përdorimin e termit. Sipas tij, ekonomia gjermane po rritet me gjysmë për qind në vit më së shumti, që do të thotë rritje mesatare në baza tremujore prej diku midis 0.1% dhe 0.2%.

Nga të dhënat e përditësuara, Ifo pret një rritje me 0.9% vitin e ardhshëm, nën parashikimin e mëparshëm 1.5% dhe me 1.5% në 2026. Inflacioni ka vazhduar të bjerë këtë vit dhe pritet në 2.2%, nga 5.9 % në vitin e kaluar. Ajo do të vazhdojë trajektoren e saj rënëse, duke shkuar në 2.0% në 2025 dhe 1.9% në 2026.

Pavarësisht lehtësimit të inflacionit, konsumi pritet të mbetet i dobët, pasi njerëzit janë të pasigurt dhe kursejnë më shumë.

Norma e kursimeve të Gjermanisë qëndron në 11.3%, dukshëm mbi mesataren 10-vjeçare prej 10.1% para pandemisë. Papunësia ka të ngjarë të rritet në 6.0% në 2024 nga 5.7% në 2023. Më pas do të bjerë në 5.8% vitin e ardhshëm dhe do të arrijë në 5.3% në 2026, sipas të dhënave të institutit.

Wollmershaeuser tha se Gjermania po vuan një krizë strukturore, pasi po bëhen shumë pak investime, veçanërisht në prodhim, dhe produktiviteti ka ngecur prej vitesh.

Prodhimi pritet të bjerë me 2.0% këtë vit në krahasim me vitin e kaluar. Faktorë si dekarbonizimi, digjitalizimi, ndryshimi demografik, pandemia, çmimet e energjisë dhe roli i ri i Kinës në ekonominë globale po ushtrojnë presion mbi modelet e krijuara të biznesit dhe po i detyrojnë kompanitë të rregullojnë strukturat e tyre të prodhimit, u shpreh kreu i institutit.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.