Emigracioni shton “Shkollat e Bashkuara” në Shqipëri. Relacioni: Tendencë e shkollave që mbyllen në zonat rurale është në rritje
Fenomeni i migrimit dhe emigrimit dhe rënia e lindshmërisë ka bërë që shumë shkolla në zonat rurale të mos kenë nxënës. Në këtë kontekst, qeveria po planifikon që të rikthejë një koncept ndryshe, duke riorganizuar shkollat e duke shtuar “Shkollat e Bashkuara”. Aktualisht në të gjithë vendin janë 12 Shkolla të Bashkuara që përfshijnë ciklin e arsimit e mesëm të lartë dhe ciklin e arsimit bazë. Një nismë ligjore që është në proces konsultimi publik parashikon se “Shkolla e Bashkuar”, mund të ketë edhe shkolla vartëse.
“Tendenca e shtimit të numrit të shkollave të tilla që mbyllen në zonat rurale është në rritje dhe e bën të nevojshëm bashkimin e këtyre institucioneve me institucionet të tjera më të afërta të cilat janë shkolla të arsimit fillor (AF) apo arsimit të mesëm të ulët (AMU).Një përcaktim të saktë të numrit në vitet që vijnë nuk mund ta kemi sepse kjo varet nga zhvillimi demografik i këtyre zonave” shkruhet në relacionin e nismës.
Ndryshimet e propozuara,sipas projektligjit, nuk sjellin shtesa në punonjës mësimor, pasi mësuesit që japin mësim aktualisht do të vijojnë të japin përsëri mësim në këto shkolla dhe në terma afatgjatë, për shkak të bashkimit apo aktualizimit të shkollave do të kemi edhe ulje të numrit të punonjësve mësimorë në këto institucione.
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.