Energjia e “bursës” përjashtohet nga TVSH – Hyn në fuqi në 1 janar 2023, por bursa nuk është ende funksionale

Energjia e importuar dhe furnizuar, e destinuar për t’u shitur përmes Bursës Shqiptare të Energjisë Elektrike do të përjashtohet nga Tatimi mbi Vlerën e Shtuar”. Ndryshimet në ligjin “Për tatimin mbi vlerën e shtuar”, janë botuar në Fletoren Zyrtare dhe parashikohet të hyjnë në fuqi në datën 1 janar 2023. Propozimi për këtë masë u bë nga Bursa Shqiptare e Energjisë Elektrike, si rezultat i parashikimit për fillimin e funksionimit operacional me datë 23.11.2022.

Por gjithsesi, ndonëse po afron fundi i vitit, bursa nuk është ende gati dhe nuk ka nisur operimet, ndërkohë që zyrtarisht nuk është bërë me dije një afat i ri se kur do të jetë funksionale. Të enjten ALPEX shpalli tenderin për blerjen e sistemit financiar, fiskalizim dhe fatura elektronike në Cloud, çka nënkupton se ajo nuk është ende gati për nisjen e operacioneve.

Këto janë vonesat e radhës për ngritjen e këtij instrumenti, që paraqet rëndësi të veçantë në kushtet kur çmimet e energjisë janë të luhatshme, teksa mijëra biznese tashmë janë nxjerrë në tregun e liberalizuar.

Më herët ekspertët kanë argumentuar për TV SCAN se çdo vonesë në ngritjen e bursës shqiptare të energjisë ka pasoja financiare, ndërsa e kanë konsideruar si të pajustifikueshme shtyrjen e nisjes së funksionimit të këtij instrumenti të rëndësishëm për sektorin.

Sipas planeve fillimisht parashikohet tregtimi i energjisë elektrike për tregun e ditës në avancë për Shqipërinë, ndërsa më pas tregtimi për tregun e Kosovës dhe bashkimi i dy tregjeve Shqipëri-Kosovë.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.