Energjia e tregtuar në bursë, “zero” tvsh – Propozimi i qeverisë për paketën fiskale 2023: Garanton tregtimin në treg të organizuar
Energjia e importuar që do të tregtohet përmes Bursës Shqiptare të Energjisë Elektrike do të përjashtohet nga Tatimi mbi Vlerën e Shtuar”. Ky është një ndryshimeve që propozohen në ligjin “Për tatimin mbi vlerën e shtuar”, si pjesë e paketës fiskale për vitin 2023, të siguruar nga TV SCAN.
Sipas relacionit, që shoqëron projektligjin, qëllimi i kësaj mase është garantimi i tregtimin të energjisë elektrike në një treg të organizuar. Më konkretisht, është propozuar, përjashtimi nga TVSH-ja në import apo furnizimi brenda vendit i energjisë elektrike të destinuar për t’u shitur nëpërmjet Bursës Shqiptare të Energjisë si dhe kalimin e përgjegjësisë për pagesën e TVSH-së, personit të tatueshëm për të cilin kryhet furnizimi me energji elektrike nëpërmjet mekanizmit të revers-charge (autongarkesës).
Po ashtu, relacioni specifikon se propozimi është bërë nga Bursa Shqiptare e Energjisë Elektrike, si rezultat i parashikimit për fillimin e funksionimit operacional me datë 23.11.2022. Më tej, relacioni shpjegon sesi funksionon tregtimi i energjisë përmes bursës, si një platfromë elektronike tregtimi, si dhe rolin e bursës në faturimin e transaksioneve. Kështu, pas shpalljes së rezultatit, për të gjithë fituesit në pozicionin shitës apo blerës, BSHEE është Kundërpala Qendrore për faturimin dhe garantimin e shlyerjeve të detyrimeve dhe pretendimeve lidhur me transaksionet e shit-blerjes së energjisë.
BSHEE do t’i faturojë shitjen e energjisë elektrike çdo blerësi që rezulton fitues dhe do t’i faturojë blerjen e energjisë elektrike çdo shitësi, i cili rezulton fitues nga transaksionet në bursë. Ndërkaq, përveç përjashtimit nga TVSH-së ndryshimet ligjore specifikojnë mekanizmin e autongarkesës, ku TVSH-ja i ngarkohet personit për të cilin janë kryer furnizimet.
Për efekt të përllogaritjes së TVSH-së blerësi i energjisë elektrike nga Bursa Shqiptare e Energjisë Elektrike, kryen autongarkesën (reverse-charge) e TVSH-së në cilësinë e personit përgjegjës për pagesën e TVSH-së. Sipas relacionit, kjo politikë nuk ka efekt neto në buxhetin e shtetit, pasi TVSH-ja e përjashtuar në import do të kreditohet brenda vendit.
Ola Mitre / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.