Energjia “shkatërron” financat e ujësjellësve – ERRU: Çmimi u rrit me 65%. Performanca iu përkeqësua, pavarësisht rritjes së arkëtimeve
Rritja e çmimeve të energjisë elektrike gjatë vitit 2022 ka përkeqësuar situatën financiare të ujësjellësve, që edhe më herët kanë shfaqur probleme të shumta me borxhet ndaj OSHEE-së. Sipas raportit vjetor të Entit Rregullator të Ujit performanca e shoqërive të ujësjellës-kanalizimeve u përkeqësua, pavarësisht se u punua mirë në drejtim të rritjes së faturimit, përmirësim të arkëtimeve korrente dhe të prapambetura si dhe në uljen e numrit të konsumatorëve pa matës.
Sipas ERRU-së përkeqësimi ka ardhur pikërisht për shkak të rritjes së kostove për energjinë elektrike, pasi ky zë përbën pjesën kryesore të kostove të operimit dhe mirëmbajtjes të sektorit. “Konstatohet se 70% e rritjes së kostove të O&M ka ardhur si rezultat i rritjes së çmimit të energjisë elektrike, i cili në vitin 2022 është rritur me rreth 65%”, – thuhet ndër të tjera në raport. “Mbulimi i kostove së operimit dhe mirëmbajtjes” për vitin 2022, ka rënë ndjeshëm nga 103.4% në 90.5%”, – shtohet më tej.
Rritja e çmimeve të energjisë për ujësjllësit erdhën si pasojë e nxjerrjes në tregun e liberalizuar të klientëve të lidhur në tensionin 20, 10 dhe 6 KV. Nisur nga problematika e kostove të energjisë që aktualisht zënë rreth 50% të kostove operative të sektorit, ERRU rekomandon realizimin sa më shpejt të një analize “due diligence” për strategjinë e çmimeve të energjisë elektrike për sektorin UK në drejtim të mundësisë së pagesës së faturës së energjisë elektrike nga shoqëritë rajonale UK dhe ato të paagreguara, duke marrë parasysh kriterin e përballueshmërisë së pagesës së faturës së ujit nga konsumatorët dhe/ose subvencionimin e tyre. Po ashtu, kërkohet të shihet si prioritet hartimi i Planeve të Rritjes së Efiçencës së Energjisë për shoqëritë UK.
Ola Mitre/ SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.