Erdogan cakton datën e zgjedhjeve parlamentare dhe presidenciale – Pritet të përballet me zgjedhje të vështira

Presidenti i Turqisë, Rexhep Tajip Erdogan, ka shpallur 14 majin si datën e zgjedhjeve të ardhshme parlamentare dhe presidenciale në vend, duke konfirmuar se votuesit turq do të shkojnë në qendrat e votimit një muaj më herët se sa kishte shënuar më parë.

Njoftimi u bë gjatë një konference rinore në provincën veriperëndimore të Bursës. Në një video të ngjarjes të publikuar të dielën, Erdogan i cili po kërkon rizgjedhjen, dëgjohet duke thënë: “Falënderoj Zotin që jemi të destinuar të ndajmë rrugën tonë me ju, rininë tonë të vlerësuar, që do të votojë për herë të parë në zgjedhjet që do të mbahen më 14 maj”.

Erdogan fillimisht kishte lënë të kuptohet se zgjedhjet do të mbaheshin më 14 maj javën e kaluar, por tha të dielën se do të bëjë thirrjen zyrtare më 10 mars, pas së cilës Këshilli i Lartë Zgjedhor i Turqisë do të përgatitet për zgjedhjet.

Erdogan, 68 vjeç, ka qenë në detyrë që nga viti 2003, fillimisht si kryeministër dhe më pas, që nga viti 2014, si president, por këtë vit ai pritet të përballet me zgjedhje të vështira dhe të shtrënguara ndërsa vendi po lufton me inflacionin në rritje dhe një ekonomi të trazuar. Nuk është ende e qartë se cili kandidat do të kandidojë zyrtarisht kundër tij, por sondazhet e opinionit tregojnë se Erdogan është prapa disa sfiduesve të mundshëm.

Nëse asnjë kandidat nuk siguron më shumë se 50 për qind të votave, raundi i dytë i votimit do të mbahet më 28 maj.

Zgjedhjet e këtij viti duhej të mbaheshin më 18 qershor, por anëtarët e Partisë AK në pushtet (AKP) sugjeruan zhvendosjen e datës për të shmangur një koincidencë me verën dhe festat fetare.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.