ERRU, vendim për tarifat e ujësjellësve – “Deri në përfundim të bashkimit të plotë, përdorni aktualet. 3 muaj kohë për licencën e re”

Enti Rregullator i Ujit ka përcaktuar procedurat që do të ndjekin shoqëritë e ujësjellës – kanalizimeve, që po nënshkurajnë marrëveshje për bashkimin e tyre, duke i hapur rrugë aplikimit për tarifa të reja. Sipas vendimit, Shoqëritë UK që përfundojnë procedurat e riorganizimit në formën e Subjekteve me Kompetenca të Përbashkëta, duhet të aplikojnë pranë ERRU brenda tre muajve nga përfundimi i procesit të plotë të transferimit, për pajisjen me licencë të re shërbimi.

Ndërkohë që, deri në miratimin e tarifave të reja, ujësjellësit do të duhet të përdorin tarifat aktuale për zonat e shërbimit të miratuara nga ERRU. Harmonizimi gradual i tarifave në zonën e shërbimit sipas ndarjeve territoriale të bashkive ishte një nga objektivët kryesorë të vendimit të qeverisë për riorganizimin e sektorit.

Referuar marrëveshjeve të nënshkruara deri më tani, ujësjellësi i Durrësit, tashmë përfshin edhe Shijakun, Krujën, Kavajën dhe Rrogozhinën; ujësjellësi i Korçës, ka në përbërje edhe Devollin, Ersekën, Maliqin dhe Pustecin, ndërsa Ujësjellësi i Pogradecit është bashkuar me Prrenjasin. Aktualisht, në secilin prej këtyre qyteteve aplikohen tarifa të ndryshme për ujin e pijshëm dhe largimin e ujërave të ndotur. Ndërkohë që, me krijimin e Ujësjellësve të bashkuar, tarifat do të shkojnë drejt unifikimit, duke mos përjashtuar rritje në qytetet ku paguhet më pak.

Sipas reformës së miratuar, në total do të krijohen 15 shoqëri të ujësjellës-kanalizimeve, nga 58 kompani që janë aktualisht. Ndërkohë që, Ministria e Infrastrukturës dhe Energjisë do të zotërojë 51% të aksioneve të Subjekteve me Kompetenca të Përbashkëta.

Aktualisht, aksionet e ujësjellësve zotërohen në masën 100% nga bashkitë ku ato ushtrojnë aktivitetin, ndërkohë që sipas vendimit të qeverisë, Njësitë e Qeverisjes Vendore, që do të lidhin marrëveshje për riorganizimin e shoqërive që janë në pronësi të tyre do të zotërojnë jo më shumë se 49% të aksioneve.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.