Euro dhe paundi, në qëndrueshmëri – Ndërhyrja e Bankës së Japonisë e rrit jenin me rreth 3%
Euro po tregtohet e qëndrueshme pranë 1.06 dollarëve edhe në sesionin e sotëm, ndërsa luhatjet më të mëdha i ka pësuar jeni japonez, që është forcuar ndjeshëm. Banka e Japonisë njoftoi se do të ndryshojë politikën për kontrollin e yield-it të obligacioneve. Pas këtij njoftimi, dollari amerikan humbi rreth 3% të vlerës në raport me jenin, duke zbritur në rreth 132, niveli më i ulët që nga mesi i gushtit. Tashmë, fokusi do të jetë te konferenca për mediat e guvernatorit të Bankës së Japonisë, Haruhiko Kuroda, i cili do të japë detaje edhe mbi programin e lehtësimit sasior.
Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 104.4, shumë pranë nivelit më të ulët në 6 muajt e fundit. Ndërkohë, paundi britanik po tregtohet i qëndrueshëm në rreth 1.2150 dollarë dhe investitorët po përllogarisin efektet që do të kenë politikat monetare të bankave qendrore më të mëdha të botës.
Javën e kaluar, Rezerva Federale, Banka Qendrore Europiane dhe Banka e Anglisë rritën me gjysëm pikë përqindje normën bazë të interesit për të luftuar inflacionin e lartë. Në tregun e kriptomonedhave, bitcoin po tregtohet në rreth 16,800 dollarë, ndërsa ethereum po tregtohet në rreth 1210 dollarë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.