Euro, e qëndrueshme pranë 1.09 dollarëve – Ngadalësohet inflacioni në Gjermani dhe Spanjë, gjatë marsit

Euro vijon të qëndrojë në mbi 1.09 dollarë edhe në sesionin e sotëm, pasi të dhënat mbi inflacionin të publikuara në Gjermani kanë rritur mundësitë që Banka Qendrore Europiane të ngadalësojë hapin e rritjes së interesave.

Rritja e çmimeve u ngadalësua ndjeshëm në Gjermani, gjatë muajit mars, për shkak të uljes së çmimeve të energjisë, por megjithatë shifra ishte më e lartë se parashikimet e analistëve.

Një raport tjetër tregoi se çmimet e konsumit në Spanjë u rritën me 3.3% me bazë vjetore, gjatë marsit, hapi më i ngadaltë i rritjes në 12 muajt e fundit. Ndërkohë, Banka Qendrore Europiane, që e ka bërë të qartë se do të rrisë interesat në vijim, në varësi të të dhënave ekonomike, e ka rritur normën bazë të interesit me 350 pikë bazë, në totalin e 3% që nga korriku i vitit të kaluar, në përpjekje për të ulur inflacionin.

Monedha europiane po qëndron në mbi 1.09 dollarë dhe gjatë këtij muaji ka fituar rreth 2% të vlerës. Në tregun e kriptomonedhave, bitcoin ka zbritur sërish pranë 28 mijë dollarëve, ndërsa ethereum po tregtohet në rreth 1800 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.