Euro ngjitet në mbi 1.05 dollarë – Investitorët presin të dhënat mbi punësimi në SHBA për nëntorin

Dollari amerikan ka vijuar tendencën në rënie edhe në sesionin e sotëm, pasi presidenti i Rezervës Federale, Jerome Powell, deklaroi se banka qëndrore do të ngadalësojë hapin e rritjes së interesave, në takimin e këtij muaji. Për këtë arsye, dollari realizoi humbjet më të mëdha mujore që nga viti 2010.

Megjithatë, Powell shtoi se lufta kundër inflacionit është ende shumë larg fundit, ndërsa ka paqartësi të mëdha. Tashmë, analistët presin që Rezerva Federale të rrisë me 50 pikë bazë normën bazë të interesit në takimin e 13 dhe 14 dhjetorit. Indeksi që mat ecurinë e dollarit amerikan, përballë shportës me 6 monedhat kryesore ndërkombëtare ra nga niveli më i lartë në 20-vitet e fundit prej 114.8, të regjistruar më 28 shtator, në rreth 105 ditën e sotme, niveli më i ulët në 16 javët e fundit.

Gjatë muajit nëntor, ndërkohë, dollari ka humbur 5.1% të vlerës, performanca më e dobët mujore që nga shtatori i vitit 2010. Investitorët po presin edhe të dhënat mbi punësimin në SHBA për muajin nëntor, që do të publikohen më vonë gjatë ditës së sotme. Analistët parashikojnë se ekonomia amerikane do të ketë krijuar edhe 200 mijë vende të reja pune muajin e kaluar, nga 260 mijë që u krijuan në tetor. Në tregun e kriptomonedhave, bitcoin po tregtohet i qëndrueshëm pranë 17 mijë dollarëve, niveli më i lartë në 2 javët e fundit. Ethereum po tregtohet në rreth 1280 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.