Euro ngjitet pranë 1.04 USD – Rezerva Federale pritet të ngadalësojë hapin e rritjes së interesave

Monedha e përbashkët europiane, euro, është rritur ndjeshëm gjatë sesionit të sotëm, pranë 1.04 dollarëve, pavarësisht paralajmërimeve të zyrtarëve të Rezervës Federale për të shtrënguar politikat monetare. Indeksi që mat ecurinë e dollarit amerikan, përballë shportës me 6 monedhat kryesore ndërkombëtare ka rënë poshtë 106, ndërsa javën e kaluar ra me rreth 3.9%.

Kjo ishte performanca më e dobët javore që nga marsi i vitit 2020. Tashmë, manaxherët e parasë parashikojnë se ka 89% mundësi që Rezerva Federale të ngadalësojë hapin e rritjes së normave të interesit në takimin e 14 dhjetorit. Edhe paundi britanik ka zgjeruar fitimet, duke u ngjitur në rreth 1.18 në raport me dollarin amerikan.

Paralelisht, edhe Banka Qendrore Europiane pritet të rrisë normën bazë të interesit në takimin e dhjetorit, pasi inflacioni në Eurozonë vijoi tendencën në rritje edhe gjatë tetorit, duke prekur nivelin e 10.7%. Në tregun e kriptomonedhave, bitcoin është ngjitur sërish pranë 16,800 dollarëve, ndërsa ethereum po tregtohet në rreth 1260 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.