Euro ngjitet sërish në mbi 1.06 USD – Tregtia karakterizohet nga një volum i ulët, për shkak të festave

Euro është ngjitur sërish mbi nivelin e 1.06 dollarëve në sesionin e sotëm, ndërsa tregtia po karakterizohet nga një volum i ulët, për shkak të festave të fundvitit. Edhe për ditën e mbetura në 2022, pritet që tregtia të jetë e qetë, pasi investitorët mbyllin bilancet e tyre. Të enjten, ndërkohë, dollari u forcua lehtë për shkak të të dhënave pozitive mbi ekonominë amerikane, që kanë përforcuar pritshmëritë se Rezerva Federale do të vijojë me politikën e saj agresive, për të luftuar inflacionin.

Paundi po këmbehet në rreth 1.2 dollarë, ndërsa euro po këmbehet në mbi 1.06 dollarë. Por, monedha europiane është gjendur nën presion, për shkak të të dhënave të dobëta për ekonominë e Eurozonës dhe luftës në Ukrainë. Referuar të dhënave të tjera, numri i amerikanëve që aplikuan për përfitimin e asistencës së papunësisë u rrit më pak se parashikimet e analistëve, gjatë javës së kaluar, që sugjeron se tregu i punës vijon të jetë solid.

Një tjetër raport sugjeroi se ekonomia amerikane u rrit me 3.2% në tremujorin e tretë, pas një kontraktimi të lehtë në gjysmën e parë të vitit. Indeksi që mat ecurinë e dollarit amerikan, përballë shportës më 6 monedhat kryesore ndërkombëtare po qëndron në rreth 104.2. Në tregun e kriptomonedhave, bitcoin po tregtohet në rreth 16,800 dollarë, ndërsa ethereum po tregtohet në rreth 1220 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.