Euro zbret poshtë 1.03 dollarë – Investitorët presin të tjera të dhëna mbi ekonominë amerikane
Dollari amerikan po qëndron në rritje në sesionin e parë të kësaj jave, pasi është preferuar nga investitorët duke përfituar nga statusi i parajsës së sigurtë. Në anën tjetër rritja e infektimeve me Covid-19 në Kinë ka dëmtuar juanin. Indeksi që mat ecurinë e dollarit amerikan përballë monedhave kryesore ndërkombëtare po qëndron në mbi 107, niveli më i lartë që nga 11 nentori.
Ky indeks u rrit me 0.5% gjatë javës së kaluar, fitimet më të mëdha javore në një muaj. Megjithatë, pavarësisht rimëkëmbjes së lehtë, monedha amerikane pritet të realizojë performancën më të dobët mujore që nga korriku i vitit 2020.
Komentet e bëra nga zyrtarët e Rezervës Federale e kanë mbështetur monedhën amerikane në sesionet e fundit. Tashmë, investitorët po presin të dhëna të tjera ekonomike për të parashikuar më saktë politikën monetare që do të ndjekë banka qëndrore më e madhe në botë. Tregjet po presin edhe procesverbalin e takimit të nëntorit të Rezervës Federale, që do të publikohet të mërkurën.
Monedha e përbashkët europiane, euro, ka zbritur poshtë nivelit të 1.03 dollarëve, ndërsa paundi po tregtohet në rreth 1.18 dollarë. Në tregun e kriptomonedhave, bitcoin po tregtohet në rreth 16 mijë dollarë, ndërsa ethereum po tregtohet në rreth 1120 dollarë.
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.