Eurodeputetëve të dënuar iu ndërpritet pensioni – Parlamenti europian prezanton 14 masat antikorrupsion

Duke folur për skandalin e Qatargate, Roberta Metsola, presidente e parlamentit europian, propozoi ndërprerjen e pensionit, por dhe masa të tjera ndaj personaliteteve të përfshira. Ajo shtoi se duhej një kontroll më i kujdesshëm jo vetëm për sa i përket Marokut dhe Katarit për këtë cështje por dhe ndaj Rusisë dhe Kinës

Presidentja e parlamentit europian prezantoi një paketë prej 14 masash anti korrupsion për të parandaluar një skandal tjetër të kësaj natyre, duke theksuar s ekishte mbështetjen e të gjitha grupeve parlamentare. Disa nga rregullat janë ekzistuese, si për shembull: deklaratat për takimet e zhvilluara, konfliktet e interesave, nga merren pagesat dhe deklarimet e tjera që duhen bërë. Këto masa sipas saj duhen përforcuar menjëherë. Në të njëjtën kohë synohet ndalimi i akreditimeve të përhershme për ish eurodeputetët, si dhe pamundësimi i lobimit të menjëhershëm pas përfundimit të mandatit të tyre.

Metsola shpjegoi se duhet të ketë garanci që të ketë sanksione të menjëhershme përfshirë dhe ndërprerjen e pagës. Por disa nga grupet parlamentare kanë shkuar dhe më tej duke kërkuar ndërprerjen e pensionit.

Të hënën nis dhe procedura për heqjen e imunitetit të eurodeputetëve të përfshirë në skandalin e korrupsionit. Procedurë e cila zakonisht zgjat 90 ditë, por në këtë rast është shkurtuar në 30.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.