‘Europa të përgatitet për ndalimin e gazit rus’ – Agjencia ndërkombëtare për energjinë bën apel për marrjen e masave

Sipas kreut të Agjencisë Ndërkombëtare për Energjinë, Europa duhet të përgatitet menjëherë për një mungesë totale të furnizimit me gaz rus këtë dimër. Në një intervistë për Financial Times, kreu i agjencisë Fatih Birol u shpreh se reduktimi i furnizimeve i vendosur nga Rusia një javë më parë mund të jetë një paralajmërim për reduktime të mëtejshme, një përpjekje e Moskës për ta përdorur situatën si “levë” për luftën në Ukrainë.

Ai theksoi se sa më shumë i afrohemi dimrit, aq më qartë kuptohen qëllimet e Rusisë. Birol  u shpreh se reduktimet po kryhen që Europa të mos mund të grumbullojë rezerva për sezonin e dimrit. Agjencia ndërkombëtare për energjinë ishte ndër organizmat e parë ndërkombëtarë që akuzoi publikisht Rusisë se po manipulonte furnizimet me gaz për Europën për shkak  të pushtimit të Ukrainës. Birol gjithashtu justifikoi masat e marra nga disa vende europiane këtë javë për të reduktuar kërkesat për gazin rus, përfshirë këtu dhe riaktivizimin e centraleve të vjetra me qymyr.

Por në rast të një ndalimi total të eksporteve ruse, sipas Birol, vendet duhet të bëjnë çfarë të jetë e mundur për të garantuar rezervat, përfshirë këtu dhe racionimin e gazit nëse do të jetë e domosdoshme.

Në një raport të fundit të agjencisë për sa i përket investimeve, rezulton se qeveritë europiane nuk po bëjnë ende mjaftueshëm dhe se investimet totale energjitike duhet të rriten këtë vit me 8%. Ai shtoi se pa politika për reduktimin domethënës të konsumit të lëndëve djegëse, bota do të vazhdojë të përballet me luhatje të mëdha të çmimeve të naftës dhe gazit. Për sa i përket vendeve në zhvillim një nga tendencat më shqetësuese sipas tij qëndron në investimet e dobëta në energjinë e pastër.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.