Finlanda miraton ligjin për të forcuar kufirin me Rusinë!

Parlamenti i Finlandës ka miratuar legjislacionin për të ndërtuar gardhe më të forta në kufirin e tij me Rusinë, pasi vendi kërkon të bashkohet me NATO-n pas pushtimit të Ukrainës nga Moska.

Finlanda ndryshoi dekada të mos-angazhimit ushtarak duke kërkuar anëtarësimin në aleancën ushtarake në maj, duke filluar zyrtarisht procesin për t’u bashkuar këtë javë.

Nga frika se Moska mund të përdorë migrimin për të ushtruar presion politik, ndryshimet e reja në Aktin e Rojës Kufitare lehtësojnë ndërtimin e gardheve më të forta në kufirin lindor 1300 km të vendit me Rusinë.

Qëllimi i ligjit është të “përmirësojë kapacitetin operacional të rojës kufitare për t’iu përgjigjur kërcënimeve hibride”, tha Anne Ihanus, një këshilltare e lartë në ministrinë e brendshme.

Siç qëndron, kufijtë e Finlandës janë të siguruar kryesisht me gardhe të lehta prej druri, të krijuara kryesisht për të ndaluar bagëtinë që të endet nga njëri vend në tjetrin.

Ligji i ri mundëson gjithashtu mbylljen e pikave kufitare dhe përqëndrimin e azilkërkuesve në pika të veçanta, në rast të përpjekjeve për kalim në shkallë të gjerë.

Helsinki miratoi gjithashtu ndryshime në legjislacionin për kompetencat emergjente për të bërë që përkufizimi i “emergjencës” të marrë parasysh më mirë kërcënimet e ndryshme hibride.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.