FMN parashikon rritje 3,8% për Kosovën – “Ekonomia e vendit vazhdon të performojë mirë”

Fondi Monetar Ndërkombëtar (FMN) deklaron se ekonomia e Kosovës vazhdon të performojë mirë, përkundër një mjedisi sfidues. Rritja reale e PBB-së u moderua në 3.3 % në vitin 2023, mes kërkesës së jashtme të ndrydhur dhe parashikohet të përshpejtohet në 3.8 % në vitin 2024, e nxitur nga kërkesa e brendshme. Inflacioni është ngadalësuar ndjeshëm, duke arritur në 2% në tremujorin e parë të 2024.

Sipas FMN, politikat fiskale kanë mbetur të matura, me një deficit të përgjithshëm fiskal prej 0.2 % të PBB-së në 2023-shin, duke reflektuar mbledhje të forta të taksave. Deficiti i përgjithshëm parashikohet të zgjerohet në rreth 1.5 % të PBB-së në vitin 2024, me shpenzime më të larta për investime dhe grante më të ulëta. Sistemi bankar mbetet likuid, i mirëkapitalizuar dhe fitimprurës, me nivel të ulët të kredive me probleme dhe mbulim të bollshëm të provigjioneve. Ndërkohë, që rezultatet fiskale kanë tejkaluar pritshmëritë, duke reflektuar angazhimin e autoriteteve.

Autoritetet po avancojnë një agjendë ambicioze të gjelbër. Sipas FMN, përfundimi me sukses i një ankandi konkurrues pilot për prodhimin e energjisë diellore dhe një ankand i parë për prodhimin e energjisë elektrike nga era janë hapa të rëndësishëm në planin e autoriteteve për të zgjeruar kapacitetin e energjisë së rinovueshme. Reduktimi i emetimeve dhe përmirësimi i cilësisë së ajrit, rritja e efikasitetit energjetik, përmirësimi i synimit të subvencioneve të energjisë dhe rritja e sigurisë energjetike janë synime të rëndësishme të agjendës së gjelbër të Kosovës.

Dorina Kurtaj/ SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.