Franca dhe Italia, gati për një tjetër vit të thatë – Tkurren lumenjtë dhe liqenet në Europën Perëndimore

Italia dhe Franca po përgatiten për të dytin vit radhazi thatësire pas një dimri anormalisht të thatë. Në të gjithë zonat e Europës Perëndimore, shtretërit e lumenjve të tharë dhe tkurrja e liqeneve janë aktualisht një pamje e zakonshme.

Qeveritë po hartojnë plane veprimi për t’u përgatitur për rendimentet e zvogëluara të të korrave – dhe për të kufizuar përdorimin e ujit përpara asaj që ka të ngjarë të jetë një verë tjetër e nxehtë dhe e thatë. Kryeministrja italiane Giorgia Meloni ka vendosur të emërojë një “komisioner të jashtëzakonshëm me kompetenca ekzekutive” për të zbatuar planin e qeverisë për betejën kundër thatësirës. Ekspertët thonë se hera e fundit që vendi përjetoi dy vite thatësire të njëpasnjëshme ishte 1989-90, por kushtet janë më të rënda tani. Me reshjet e pakta të dëborës dimërore që përkthehen në shkrirje jashtëzakonisht të pamjaftueshme të borës për të furnizuar përrenjtë dhe degët që derdhen në lumin Po, fermerët në rajonin Emilia-Romagna të Italisë shqetësohen se mund të duhet të braktisin kulturat tradicionale si misri dhe soja dhe të mbjellin luledielli në vend të tyre.

Reshjet e regjistruara në Itali në fund të muajit të kaluar, duket se dëmtuan dhe më shumë disa prej fermerët. Një kombinim i temperaturave më të ulëta, borës dhe ngricave kërcënuan kulturat frutore që, për shkak të një dimri më të ngrohtë, tashmë kishin filluar të lulëzojnë, veçanërisht pemët e bajameve, pjeshkës dhe qershisë.

Nga ana tjetër Franca regjistroi 32 ditë pa shi këtë dimër – thatësira më e gjatë e dimrit që nga fillimi i mbajtjes së regjistrave në vitin 1959. Nivelet e borës në Alpet Franceze, Pirenej dhe vargmalet e tjera malore franceze janë gjithashtu shumë më të ulëta se zakonisht për këtë periudhë të vitit. Presidenti francez Emmanuel Macron premtoi se qeveria e tij do të hartonte një “plan urgjent uji” në mars.

Dy verat e fundit në Francë gjithashtu ishin jashtëzakonisht të thata, duke nxitur disa fermerë të konsiderojnë kalimin në kultura të reja.

Në Gjermani, ekspertët thonë se shiu në fillim të vitit nuk do të mjaftojë për të rimbushur pjesët më të thella të tokës që janë tharë në nivele shqetësuese vitet e fundit. Zyra Federale e Statistikave të Gjermanisë tha se thatësira dhe nxehtësia çuan në një rënie të ndjeshme të korrjes së perimeve vitin e kaluar, e cila ishte 12% më pak në krahasim me vitin 2021 – një vit rekord – dhe 2% më pak në krahasim me mesataren pesëvjeçare.

Falë shiut të fundit në Spanjë, rezervat ujore janë në kapacitetin 51%, shumë më tepër se 35% e fundit të vitit 2022. Viti i kaluar ishte viti i tretë më i thatë në Spanjë dhe më i nxehti që nga viti 1961. Moti i thatë mbetet një shqetësim në rajonin e Katalonjës të Spanjës, ku përdorimi i ujit është kufizuar në bujqësi dhe industri që nga nëntori dhe përdorimi i ujit të pijshëm për të larë makinat ose për të mbushur pishinat është i ndaluar.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.