Franca, Italia dhe Rumania me kërkesë të përbashkët – “Duhet të vendoset kufi për çmimin e gazit në Europë”

Për t’u ardhur në ndihmë konsumatorëve Franca, Italia, Rumania dhe dhjetëra vende të tjera anëtare të Bashkimit Europian kanë shtuar presionin për vendosjen e një kufiri për cmimin e gazit në nivel europian.

Gjithësesi këto vende po përballen me kundërshtimin e vendeve si Holanda dhe Gjermania, të cilat shqetësohen se furnizuezit mund të shesin gazin e tyre diku tjetër. Komisioni europian propozon një kufi të përkohshëm çmimi, si dhe që anëtarët e BE-së të bashkojnë forcat për të blerë gazin së bahsku, duke ulur në këtë mënyrë çmimin e tij.

Nëse ministrat e energjisë nuk do të arrijnë të gjejnë një marrëveshje javën e ardhshme, krerët e qeverive duhet të gjejnë një zgjidhje në samitin e 15 dhjetorit. Qytetarët europianë shprehen se problemi qëndorn në faktin se çmimet e gazit po shënojnë rekorde të reja, dhe për muajin nëntor parashikohet që fatura e gazit për bizneset e vogla të arrijë deri në 12 mijë euro në muaj. Aktualisht ata paguajnë mesatarisht 1400 euro në muaj.

Disa ditë më parë qeveria holandeze vendosi të ofrojë kredi me kosto të ulët për furrat e bukës që vendosin të zëvendësojnë furnelat me gaz me ato me energji elektrike, por kjo sipas pronarëve nuk është zgjidhje pasi ky proces mund të zgjasë rreth 2 vjet e gjysëm.

Për të shmangur mbylljen e sipërmarrjeve që varen nga energjia, Bashkimi Europian mund të shtojë sërish mbështetjen financiare për konsumatorët e gazit dhe elektricitetit.

Që nga fillimi i krizës energjitike në shtator të 2021-shit, janë dhënë rreth 600 miliardë euro në vendet anëtare të Bashkimit Europian për të mbrojtur konsumatorët dhe sipërmarrjet nga rritja e çmimit të energjisë elektrike.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.