Franca përgatitet për krizë energjetike- Apel qytetarëve dhe bizneseve që të kufizojnë konsumin

Krerët e kompanive të mëdha energjitike në Francë, iu bënë apel qytetarëve dhe bizneseve që të kufizojnë konsumin e energjisë elektrike dhe të përgatiten për një krizë në këtë sektor.

Në deklaratën e përbashkët për shtyp thuhej se të gjithë duhet të bashkëpunojnë në mënyrë që situata të jetë nën kontroll. Letra e firmosur nga krerët e kompanisë citonte një reduktim të konsiderueshëm të furnizimit me gaz nga Rusia por dhe një prodhim të kufizuar të energjisë elektrike për shkak të disa cështjeve të mirëmbajtjes.

Franca synon të grumbullojë rezervat e saj të gazit brenda vjeshtës, sipas deklaratës së kryeministres së vendit, që theksoi se aktualisht vendi ka 59% të rezervave totale.

Pushtimi rus i Ukrainës ka nxjerrë në dritë varësinë e Europës nga gazi rus, duke shkaktuar dhe një garë me kohën për të gjetur burime të tjera energjie.
Mediat franceze raportuan në muajin mars se qeveria ishte në bisedime me “TotalEnergies” për shtimin e kapaciteteve për furnizim me gaz të lëngshëm pasi Shtetet e Bashkuara të Amerikës deklaruan se ishin të gatshme të rrisnin volumin e furnizimit në Europë.

Drejtuesit e kompanive energjitike theksuan se ndërmarrja e menjëhershme e veprimeve gjatë verës do i lejojë qytetarët që të jenë gati për dimrin, dhe për të ruajtur rezervat e gazit. Por ata këmbëngulin se kufizimi i konsumit duhet të jetë i menjëhershëm, kolektiv dhe masiv. Ata u shprehën se po përpiqen që të gjejnë burime të tjera për furnizim me gaz dhe po ndërtojnë një terminal lundrues të gazit të lëngshëm në portin verior  të Lë Havre

Franca kohët e fundit ka zgjatur në kohë mekanizmin për rregullimin e cmimit të gazit deri në fund të vitit. Fillimisht i planifikuar të zgjasë deri në fund të qershorit, sistemi ka për qëllim të kufizojë efektet e rritjes së çmimeve të energjisë në fuqinë blerëse të konsumatorëve.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.