Franca, planifikon të kursejë ujin – Macron publikon 50 masa për të përballuar thatësirën, mes të cilave edhe rritjen e çmimit

Presidenti francez Emmanuel Macron publikoi një strategji për të kursyer ujin dhe theksoi se protestat nuk do t’i ndalin reformat, si për ndryshimin e klimës, ashtu edhe për pensionet. Plani i kursimit të ujit përfshin 50 masa, të tilla si rregullimi i tubacioneve, përshtatja e mënyrës se si fermerët dhe industria bërthamore përdorin ujin dhe shtrenjtimi për ata që përdorin më shumë.

“Në fillim të këtij viti kemi pasur një rekord shqetësues, me 32 ditë radhazi pa reshje shiu dhe vendi ynë është në një periudhë të paprecedentë të thatësirës dimërore”, tha ai në një fjalim.

Kjo ishte dalja e parë publike e presidentit pas javësh të fokusuara në projektligjin e pensioneve, i cili ka shkaktuar protesta të ashpra në të gjithë vendin. Me planin e ujit, Macron dhe qeveria e tij po kërkojnë të kalojnë në tema të tjera. Rreth 58% e ujit të përdorur në Francë shkon për bujqësi, 26% për ujë të pijshëm, 12% për të ftohur reaktorët bërthamorë dhe 4% për industrinë.

Në disa qytete, gjysma e ujit humbet me një mesatare mbarëkombëtare prej 20%. Macron tha se, plani i emergjencës do të kushtojë 180 milionë euro për të rregulluar rrjedhjet në qytetet më të rrezikuara dhe përmirësuar rrjetet. Përtej kësaj, masa të tjera si shtrenjtimi i ujit pasi të mbulohen nevojat bazë, synojnë të inkurajojnë njerëzit dhe bizneset që të përdorin më pak, tha ai.

Macron, gjithashtu planifikon lançimin e një aplikacioni të ri që do të informojë banorët nëse përdorimi i ujit në zonën e tyre ka arritur një nivel kritik në modelin e aplikacionit Ecoëatt të lançuar për përdorimin e energjisë elektrike për të inkurajuar kursimet këtë dimër.

Dorina Kurtaj/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.