Franca sërish në grevë kundër reformës së pensioneve – Këtë herë, ndërpritet prodhimi i energjisë, shkollat dhe transporti publik

Një grevë e dytë mbarëkombëtare në Francë ka ndërprerë prodhimin e energjisë elektrike, transportin publik dhe shkollat, në një reagim kundër planeve të qeverisë për t’i bërë njerëzit të punojnë më gjatë përpara daljes në pension.

Sindikatat, që kanë zhvilluar tubime proteste në të gjithë Francën, duan të vazhdojnë presionin ndaj qeverisë dhe shpresojnë të përsërisin pjesëmarrjen e madhe si ditën e parë kombëtare të protestës më 19 janar.

Atë ditë, më shumë se një milion njerëz marshuan kundër shtyrjes së moshës së pensionit nga 62 në 64 vjeç dhe përshpejtimit të një vonese të planifikuar në moshën e pranueshme për pension të plotë. Ata e konsiderojnë reformën në fjalë si të padrejtë dhe brutale dhe se lëvizja e moshës së daljes në pension në 64 vjeç po çon vendin një hap prapa në aspektin social.

Vetëm një në tre trena me shpejtësi të lartë udhëtuan gjatë ditës dhe akoma më pak trena lokalë dhe rajonalë ishin në dizpocion të pasagjerëve, ndërsa metroja e Parisit ndaloi plotësisht çdo aktivitet.

Gjysma e mësuesve të shkollave fillore nuk u paraqitën në vendet e punës sipas sindikatave të tyre, ndërsa stafi i rafinerisë së naftës dhe punëtorët në sektorë të tjerë, duke përfshirë radiot dhe televizionet publike, që transmetuan muzikë në vend të programeve dhe lajmeve, gjithashtu u bënë pjesë e grevës.

Furnizimi me energji u ul me 4.4%, ose 2.9 gigavat, pasi punëtorët në reaktorët bërthamorë dhe termocentrale iu bashkuan grevës.

TotalEnergies tha se nuk kishte asnjë dërgesë të produkteve të naftës për shkak të grevës, duke shtuar se pompat e benzinës ishin plotësisht të furnizuara dhe se nevojat e klientëve po plotësoheshin.

Sondazhet e fundit tregojnë se shumica e francezëve e kundërshtojnë reformën, por presidenti Emmanuel Macron dhe qeveria e tij synojnë të qëndrojnë në pozicionin e tyre. Një ditë më parë kreu i shtetit u shpreh se reforma është “jetike” për të siguruar që sistemi i pensioneve të vazhdojë të funksionojë.

Shtyrja e moshës së daljes në pension me dy vjet dhe zgjatja e periudhës së pagesës do të jepte 17.7 miliardë euro shtesë në kontribute pensionale vjetore, sipas vlerësimeve të Ministrisë së Punës. Sindikatat thonë se ka mënyra të tjera për ta bërë këtë, të tilla si taksimi i super të pasurve ose t’u kërkohet punëdhënësve apo pensionistëve të pasur të kontribuojnë më shumë.

Qeveria bëri disa lëshime në projektligj, të tilla si caktimi i moshës së re të pensionit në 64 vjeç në vend të premtimit të fushatës së Macron prej 65, si dhe duke rënë dakord për një pension minimal prej 1200 euro në muaj për të gjithë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.