“Frika” për energjinë e inflacionin shtrenjtojnë drutë – Vëzhgimi i SCAN: Si ka ndryshuar çmimi në Korçë, Dibër, Kukës e Tiranë?!

Rritja e çmimeve dhe paralajmërimet për një situatë jo të mirë me energjinë elektrike në muajt në vijim, është reflektuar edhe në çmimin e druve të zjarrit, që përbëjnë një nga mjetet kryesore për ngrohje e gatim për familjet shqiptare. SCAN ka kryer një vëzhgim në tre qarqe të rëndësishme të vendit, familjet e të cilave e kanë zjarrin, të vetmen mundësi për të përballur temperaturat e ulëta të dimrit.

Nga vëzhgimi i kryer, në rajonin e Korçës 1 metër kub dru ka arritur në 7500 lekë, në Kukës 5 mijë lekë ndërsa në Dibër 7 mijë lekë.

Por çfarë ka ndodhur këtë vit? Si kanë ndryshuar shifrat në krahasim me vitin e kaluar?

Familjet korçare në ndryshim nga një vit më parë detyrohen t’i blejnë 67% më shtrenjtë drutë e zjarrit. Nëse një vit më parë një metër kub dru në Korçë kushtonte 4500 lekë tashmë qytetarët nuk mund ta blejnë më lirë se 7500 lekë metrin kub.

Pothuajse në të njëjtën pozitë ndodhen dhe familjet dibrane të cilat prej dy vitesh duhet t’i blejnë drutë 75% më shtrenjtë. Nga 4 mijë lekë që ishte para dy vitesh, në dy vitet e fundit çmimi i një metri kub dru vijon të mbetet 7 mijë lekë metri kub.

Ndërsa në Kukës çmimi i druve ka lëvizur me 25% . Një familje në Kukës detyrohet t’i blejë drutë me 5 mijë lekë metri kub nga 4 mijë lekë që ishte një vit më parë.

Ndërkohë, kryeqyteti shqiptar, Tirana vijon të mbajë rekord për çmimin më të lartë të druve, ku 1 metër kub kushton 7 mijë e 500 lekë për metër kub dru.

Por sa duhet të shpenzojë mesatarisht një familje e zonave malore për ta kaluar dimrin duke u ngrohur e duke gatuar me dru zjarri?

Një familje i nevojiten mesatarisht 10 metër kub dru për t’u ngrohur ose e thënë ndryshe me çmimin aktual, 75 mijë lekë të reja. Ndërkohë, të dhënat zyrtare tregojnë se më shumë se 50 përqind e familjeve shqiptare kanë ende drutë e zjarrit si llojin kryesor të enërgjisë për ngrohje. Edhe pse ka një tendencë rënëse nga viti në vit, në zonat rurale, përdorimi I druve të zjarrit është ende masiv…

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.