G7 mbështet kufizimin e çmimeve të naftës ruse – Moska paralajmëroi se vendimi do të çonte në destabilizimin e tregut global
Grupi i Shtatë vendeve më të industrializuara të botës ranë dakord për të zbatuar një mekanizëm kufizimi të çmimeve në eksportet e naftës ruse, duke kërkuar të tkurrin aftësinë e Kremlinit për të financuar luftën në Ukrainë, si dhe për të mbrojtur më mirë konsumatorët nga çmimet në rritje të energjisë.
Ministrat e Financave që përfaqësojnë vendet e G7 thanë në një deklaratë të përbashkët se ata pranojnë se, për Bashkimin Europian, kërkohet unanimiteti midis bllokut prej 27 vendesh. “Ne synojmë të harmonizojmë zbatimin me afatin kohor të masave të lidhura brenda paketës së gjashtë të sanksioneve të BE-së,” thanë ata.
Kufiri fillestar i çmimit do të vendoset “në një nivel të bazuar në një sërë inputesh teknike”. Deklarata nga G7 shtoi se efektiviteti dhe ndikimi i kufirit të çmimit do të monitorohen nga afër dhe do të rishikohen sipas nevojës. G7 përbëhet nga SHBA, Kanadaja, Franca, Gjermania, Italia, Britania e Madhe dhe Japonia.
Përpara këtij njoftimi, Moska paralajmëroi se do të ndalojë shitjen e naftës për vendet që vendosin kufizime të çmimeve në eksportet ruse të energjisë dhe tha se vendosja e një kufiri për naftën bruto të vendit do të çonte në destabilizimin e mëtejshëm të tregut global të naftës. G7 fillimisht ra dakord të eksploronte perspektivën e vendosjes së një ndalimi për dërgesat e naftës ruse mbi një çmim të caktuar në qershor.
Analistët e energjisë kanë qenë shumë skeptikë në lidhje me integritetin e propozimit, duke paralajmëruar se politika mund të dështojë nëse konsumatorët kryesorë si Kina dhe India nuk janë të përfshirë.
Të dhënat nga Agjencia Ndërkombëtare e Energjisë treguan se eksportet ruse të naftës në qershor ranë me 250,000 fuçi në ditë krahasuar me majin, në 7.4 milionë fuçi, niveli më i ulët që nga gushti i vitit të kaluar.
Megjithatë, të ardhurat nga eksporti u rritën me 700 milionë dollarë krahasuar me majin, pasi çmimet më të larta të naftës ndihmuan që të ardhurat e Rusisë nga eksporti i papërpunuar të arrinin 20.4 miliardë dollarë, duke reflektuar një rritje prej 40% mbi mesataren e vitit të kaluar.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.