Garancitë Sovrane të biznesit i kalojnë Agjencisë së Trajtimit të Kredive – Verifikim subjekteve që s’paguajnë! Bllokim llogarive bankare kur rezulton aftësi paguese

Agjencia e Trajtimit të Kredive do të marrë një rol më të rëndësishëm në menaxhimin e garancive shtetërore. Kjo parashikohet në një ndryshimet e reja që qeveria ka bërë në ligjin për borxhin publik.  Nevoja për ndryshimin e ligjit lindi nga një sërë problematikash e vështirësish të ndodhura pas emetimit, në kushtet e emergjencës së shkaktuar nga pandemia COVID-19, të dy garancive sovrane për t’i ardhur në ndihmë bizneseve të prekura.

Një ndryshim ligjor i rëndësishëm që synohet lidhet me kalimin te Agjencia e Trajtimit të Kredive të funksionit të rikuperimit të të drejtave të Ministrisë së Financave dhe  Ekonomisë, referuar edhe garancive shtetërore apo marrëveshjeve të nënhuave  nga të cilat përfitojnë subjekte publike apo ndërmarrje shtetërore, siç janë  operatorët e energjisë, ujësjellësat etj., pra duke mundësuar rekuperimin e të drejtave edhe përtej skemave të veçanta të garancive, duke qenë se ATK-ja gëzon ekspertizën e nevojshme për ta bërë këtë.

“Çështja e mbledhjes së detyrimeve nga këto subjekte kundrejt buxhetit të shtetit është një problem që i është kushtuar vëmendje e veçantë gjatë auditimeve të  KLSH-së, si dhe është pjesë e raporteve të lëshuara nga ky institucion, ndaj  konsiderohet mëse e nevojshme ndërmarrja e të gjitha masave të mundshme në  këtë drejtim, duke përfshirë këtu edhe ndryshime të nevojshme ligjore” shkruhet në relacion.

Në këtë kontekst, nëpërmjet ndryshimeve ligjore të propozuara, ndër të tjera, Agjencisë së Trajtimit të Kredive i kalon edhe ndjekja e rikuperimit të të drejtave që i lindin Ministrisë së Financave dhe Ekonomisë pas pagesave të kryera sipas skemave të garancisë. Kjo do të thotë se në rastet kur një subjekt nuk shlyen dot detyrimin e marrë me garanci shtetërore, atëhere shteti shqiptar e paguan detyrimin si pasojë e faktit se ka dhënë garanci. Por pastaj, do të jetë Agjencia e Trajtimit të Kredive ajo që do të verifikojë subjektin në fjalë, nëse ka pasur aftësi paguese ose jo dhe në bazë të verifikimit, të marrë masat e nevojshme duke arritur deri në bllokimin e llogarive bankare të subjektit dhe marrjen mbrapsht të detyrimit të paguar si garanci nga shteti.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.