Gjermania, një hap larg recesionit – Qeveria do të investojë 200 miliardë euro për të zbutur krizën energjetike

Inflacioni i lartë rekord dhe kriza e përshkallëzuar energjetike shkaktuar nga lufta në Ukrainë, po ndikon negativisht në jetën e njerëzve dhe perspektivën kombëtare social ekonomike në Gjermani. Të dhënat nga Zyra Federale e Statistikave treguan se indeksi i çmimeve të konsumit të vendit u rrit me 10% në bazë vjetore në shtator, një rekord që nga viti 1951. Gjithashtu, është hera e parë që inflacioni ka arritur shifra dyshifrore që kur Gjermania filloi të përdorte euron në vitin 2002.

Ndërprerjet e vazhdueshme në zinxhirët e furnizimit të shkaktuara nga pandemia e COVID-19, si dhe përfundimi i masave të përkohshme të transportit publik dhe subvencionimit të karburantit nga qeveria në fund të gushtit, kanë nxitur më tej rritjen e çmimeve. Duke u përballur me situatën e vështirë, zyrtarët morën masa për të frenuar çmimet në rritje.

Kancelari gjerman Olaf Scholz njoftoi të enjten se qeveria do të investojë 200 miliardë euro për të zbutur krizën energjetike dhe vendosur një tavan mbi çmimet e energjisë deri në vitin 2024. Ndërkaq, presidenti i Agjencisë Federale të Rrjetit Energjetik u bëri thirrje banorëve të kursejnë energjinë për të shmangur mungesat e gazit në dimër.

Sipas tij, ndërsa temperaturat vijojnë të ulen, konsumi i gazit natyror i familjeve gjermane dhe bizneseve të vogla u rrit ndjeshëm gjatë javës së kaluar, shumë më i lartë se konsumi në të njëjtën periudhë të viteve të kaluara. Familjet dhe bizneset e vogla konsumojnë në vit rreth 40% të gazit natyror.

Agjencia vlerësoi se duhet të kursehen të paktën 20% të konsumit të gazit natyror për të shmangur mungesat. Gjermania pritet të hyjë në recesion në vitin 2023, me një rënie të Produktit të Brendshëm Bruto prej 0.4%. Në pranverë, institutet kryesore parashikonin se ekonomia më e madhe e Europës do të rritej me 3.1% në vitin 2023.

Nga ana tjetër, rritja e ekonomisë për vitin 2022 është ulur nga 2.7%, në 1.4%. Institutet besonin se arsyeja kryesore për përkeqësimin e perspektivës ekonomike të Gjermanisë është reduktimi i furnizimeve me gaz natyror dhe kriza energjetike e shkaktuar nga konflikti Rusi-Ukrainë dhe ka çuar ekonominë gjermane në një rënie të theksuar. Çmimet e gazit parashikohet të mbeten shumë mbi nivelin para krizës, pavarësisht se situata pritet të lehtësohet në një periudhë afatmesme.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.