Gjermania rishikon objektivat për sektorin e energjisë – Nuk do të ketë një eliminim të përdorimit të qymyrit

Duke synuar shkëputjen totale nga gazi rus, Gjermani do të lejojë përdorimin e qymyrit në sektorin e energjisë duke shyrë dhe më shumë në kohë objektivin për të ulur në minimum emetimet e gazit serë. Ndërkohë që nuk është dhënë një datë e re për këtë objektiv

Qeveria gjermane synon të rishikojë një objektiv kyç klimatik për të arritur nivelin e emetimeve neto të gazeve serë në industrinë e energjisë deri në vitin 2035. Agjencia e lajmeve Reuters citon një projektligj të Bundestag.

Teksti, të cilin parlamenti gjerman do ta votojë të enjten, tërheq objektivin klimatik të vitit 2035 për sektorin e energjisë dhe në vend të kësaj synon ta arrijë atë pas heqjes graduale të termocentraleve të qymyrit. Nuk ka një datë të re për arritjen e qëllimit.

Përpara konfliktit në Ukrainë, Gjermania synonte të eliminonte qymyrin deri në vitin 2030, por me reduktimin e furnizimit me gaz rus, qeveria njoftoi muajin e kaluar se termocentralet me qymyr që duhej të hiqeshin gradualisht, mund të rifillonin.

Berlini po përpiqet gjithashtu të zhvillojë energjinë eolike dhe diellore për t’u shkëputur nga gazi rus. Në vitin 2021, Rusia përbënte rreth 55% të importeve të gazit të Gjermanisë.

Projektligji tregon gjithashtu se subvencionet e qeverisë për energjinë e rinovueshme do të skadojnë me mbylljen e termocentralit të fundit me qymyr, pa parashikuar një afat të qartë për eliminimin e tyre. Teksti përfshin gjithashtu një ndryshim në ligjin për ruajtjen e natyrës që i jep përparësi më të madhe energjisë eolike, mbi ruajtjen e specieve në disa zona dhe synon të përshpejtojë lejet për energjinë e rinovueshme duke e klasifikuar atë si në interes të publikut dhe në shërbim të sigurisë publike.

Muajin e kaluar, Ministria e Ekonomisë dhe Klimës prezantoi një paketë masash për të përshpejtuar zhvillimin e prodhimit të energjisë eolike në tokë, duke përfshirë përcaktimin e një përqindje minimale të terrenit që çdo Land duhet të vërë në dispozicion për parqet eolike.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.