Goldman ul parashikimin e naftës për shkak të “mungesës së qartësisë” mbi kufirin e çmimit të G7 dhe Kinës!

Goldman Sachs uli parashikimin e çmimit të naftës me 10 dollarë në 100 dollarë për fuçi për tremujorin e katërt të 2022, duke përmendur shqetësimet në rritje për Covid në Kinë dhe mungesën e qartësisë mbi planin e Grupit të Shtatë vendeve për të kufizuar çmimet e naftës ruse.

Kina regjistroi tre vdekje nga Covid gjatë fundjavës, vdekjet e para të vendit nga virusi që nga maji i këtij viti. Kryeqyteti i Kinës Pekini shtrëngoi masat për Covid në tre ditët e fundit pasi numri i rasteve lokale u ngjit në disa qindra në ditë.

Ekonomistët shtuan se mundësia e më shumë bllokimeve në importuesin kryesor në botë të naftës do të dëmtojë edhe më tej kërkesën prej saj.

“Rastet e Covid në Kinë janë në nivelet më të larta të Prill-22, megjithatë, funksioni i ri i reagimit të politikës është i panjohur … ne ulim pritjet tona për kërkesën e Kinës me 1.2 [milion fuçi në ditë] për tremujorin (në 14.0 mb/d), duke parashikuar bllokime të mëtejshme nga këtu”, thuhej në shënim, duke shtuar se kërkesa aktuale e Kinës për naftë bie nën pritshmëritë e Goldman për tetor-nëntor me 800,000 fuçi në ditë.

Çmimet e naftës së papërpunuar u luhatën muajt e fundit, duke u rritur në më shumë se 120 dollarë në fillim të qershorit, mes frikës në rritje për një recesion global, duke rënë më pas në rreth 90 dollarë për fuçi pasi OPEC+ uli prodhimin.

Të dy kontratat e së ardhmes së fundi janë luhatur rreth niveleve më të ulëta dy mujore: kontratat e së ardhmes së naftës Brent humbi më pak se një dollar, ose 0.9%, për të qëndruar në 86.83 dollarë për fuçi dhe kontratat e së ardhmes së West Texas Intermediate në SHBA ranë 1.09% në 79.21 dollarë për fuçi.

Gjithashtu në rishikimin në rënie të Goldman-it janë edhe vëllimet më të larta se sa pritej të prodhimit dhe eksporteve të naftës nga Rusia, vetëm dy javë përpara se embargoja e BE-së të hyjë në fuqi në fillim të dhjetorit.

“Investitorët kanë mbetur të zhgënjyer nga flukset më të larta të prodhimit dhe eksportit nga Rusia. Kjo pavarësisht se kanë mbetur vetëm dy javë përpara se embargoja e BE-së të hyjë në fuqi ndaj naftës së papërpunuar, së bashku me kufirin e çmimit të G-7, për të cilin më shumë detaje do të shpallen javën e ardhshme, “tha banka e investimeve në shënim.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.