Google studion “armën” anti ChatGPT – Nis testimi mbi sistemin “Apprentice Bard”

Google po teston produkte të reja të chat-eve bazuar në inteligjencën artificiale, që mund të cojnë në zhvillimin e një sistemi që do të ishte përballë ChatGPT, sistemi i inteligjencës artificiale i gjeneratës së fundit mbi të cilin po punon Microsoft, në gjendje për t’u përgjigjur në mënyrë njerëzore befasuese ndaj pyetjeve që i bëhen nga bashkëbiseduesi.

Testimet e Google janë përqendruar në një lloj të ri ‘chatbot’ dhe mbi mënyrat e integrimit të këtyre mjeteve në motorët e kërkimit. Mes produkteve në fazë testi është një ‘chatbot’ i quajtur Apprentice Bard: prej disa javësh të punësuarit në Google mund të bëjnë pyetje dhe të marrin përgjigje të detajuara, njësoj si ndodh me klientët e ChatGPT.

Një produkt tjetër është dhe një përballje e re për motorët e kërkimit të bazuar në një modul pyetje – përgjigje. Në këtë rast objektivi është përgatitja e motorit të kërkimit të së ardhmes dhe pritja sa më e mirë e ‘chatbot’-eve të pajisur me inteligjencë artificiale.

Testimet janë përpshpejtuar pas një takimi të fundit në kompani ku të punësuarit kanë ngritur dyshime për avantazhin konkurues të kompanisë në sektorin e inteligjencës artificiale. Kjo për shkak të popullaritetit të papritur të ChatGPT, sistem i lëshuar nga OpenAI, me seli në San Francisco e mbështetur nga Microsoft që mund të dobësojë dominimin e Google në terrenin e motorëve të kërkimit. Në përgjigje të dyshimeve të tyre, kreu i Inteligjencës Artificiale të Google, Jeff Dean, deklaroi se Google mund të prezantojë për publikun produkte të ngjashme me ChatGPT gjatë këtij viti.

Apprentice Bard përdor teknologjinë e bashkëbisedimit të Google të quajtur LaMDA (Modeli i Gjuhës për Aplikimet e Dialogut). Kësaj të fundit i është kërkuar që t’i japë prioritet punës për një reagim ndaj ChatGPT. Për një kohë të shkurtër kjo punë ka precedencën ndaj gjithë projekteve të tjera.

Apprentice Bard është i ngjashëm me ChatGPT: të punësuarit mund të fusin një pyetje në një dritare dialogu dhe të marrin një përgjigje me tekst. Sipas raportimeve të CNBC përgjigjet e Apprentice Bard mund të përfshijnë dhe ngjarje të kohëve të fundit, një funksion që ChatGPT nuk e ka implementuar ende.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.