“Green Coast”, status special për hotel me 5 yje në Palasë – Qeveria miraton vendimin, turizëm elitar në rivierën shqiptare

Kompania “Green Coast” ka fituar statusin special si investitor në strukturë akomoduese me 5 yje.  Vendimi është publikuar në Fletoren Zyrtare dhe saktëson se përgjegjëse për zbatimin e tij është ministria përgjegjëse për turizmin. “Green Coast”, pjesë e “Balfin Group”, konsiderohet si destinacioni kryesor i rivierës shqiptare, pozicionuar në Palasë,  duke ofruar cilësinë më të lartë të jetesës në një arkitekturë bashkëkohore, frymëzuar nga vlerat tradicionale të zonës.

Por përveç vilave, “Green Coast” është angazhuar edhe në ndërtimin e një hoteli markë me 5 yje, duke synuar zgjatje të sezonit përgjatë gjithë vitit, projekt i cili ka përfituar gjithashtu statusin e investimit strategjik.

Qeveria ka përcaktuar lehtësi fiskale për kompanitë që sjellin në në vend marka ndërkombëtare në sektorin e hotelerisë.  Konkretisht sipas ligjit në fuqi, strukturat, të cilat përfitojnë autorizimin nga Këshilli i Ministrave deri në dhjetor 2024, përjashtohen nga tatimfitimi për një periudhë 10-vjeçare. Efektet e përjashtimit nisin në momentin e fillimit të veprimtarisë ekonomike të strukturës akomoduese, por jo më vonë se 3 vjet nga marrja e statusit special.

Po ashtu, aplikohet edhe niveli TVSH-së prej 6 për qind për furnizimin e shërbimeve që ofrohen në hotelet me 5 yje me status special.  Ndërkohë, për të gjithë ata që kanë statusin special si hotele me pesë yje (brand name), taksa e infrastrukturës është zero.

Grupi BALFIN po zhvillon në Jug të vendit projektin për ndërtimin e të parit “MGallery hotel”, një markë luksoze, pjesë e portofolit të grupit ndërkombëtar “Accor”. Punimet pritet të përfundojnë në vitin 2024. Hoteli do të vendosë në dispozicion për turistët dhe pushuesit vendas 118 dhoma dhe suita luksoze.

Eliabeta Dosku / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.