Grekët të “etur” për kredi hipotekare – Në 7 muaj bankat disbursuan 645 milionë kredi të re për banesa   

Kërkesa për kredi për banesa në Greqi ka vijuar në rritje në muajin korrik, ashtu si në gjysmën e parë të vitit, pas një periudhe të gjatë pezullimi në vitet e mëparshme. Të dhënat zyrtare tregojnë se, kreditë e reja të dhëna nga bankat në korrik u rritën në 95 milionë euro, nga 88 milionë euro që ishin në të njëjtin muaj të vitit të kaluar, me një rritje prej 7,9%, duke i çuar disbursimet e reja të 7 muajve në 645 milionë euro, krahasuar me 438 milionë euro të një viti më parë.

Ekspertët bankarë në Greqi shprehen se kërkesa e lartë për kredi hipotekare është ndihmuar nga fakti se rritja e normës bazë të interesit nga BQE nuk është reflektuar ende në disbursimet e reja të kredive, të cilat dominohen nga normat ende të ulëta fikse të ofruara nga bankat.

Bazuar në tarifat aktuale, normat fikse të interesit fillojnë nga 2.9% për një afat 3-vjeçar dhe arrijnë deri në 4.20% për një periudhë afatgjatë 30-vjeçare. Sipas të dhënave nga bankat, më shumë se 90% e kredive të reja janë lidhur me një normë interesi fikse prej 10 vitesh.

Mbajtja e normave të interesit për kreditë e reja për banesa në nivele të ulëta konfirmohet nga të dhënat e publikuara së fundmi nga Banka e Greqisë, sipas të cilave norma mesatare e interesit për kredinë për banesa ka rënë në korrik në 2.84% nga 2.85% në qershor. Arsyeja është konkurrenca e lartë mes bankave për të rritur aksionet e tyre në financimin e ri, që është edhe pararendës i rikthimit përfundimtar në rentabilitet.

Kjo është në kundërshtim me tendencën e përgjithshme rritëse të normave të interesit, por edhe me rrjedhën e normave të interesit në bilancet ekzistuese, pra për kreditë e dhëna në të kaluarën, norma mesatare e ponderuar e të cilave është rritur në korrik në 2.15%, nga 1.99% në qershor.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.