Greqia rrit të ardhurat nga turizmi – 17.1 miliardë euro u regjistruan në 10 muajt e vitit
Turistët e huaj në Greqi arritën në 26.44 milionë, në dhjetë muajt e parë të vitit, me të ardhura që arritën në 17.1 miliardë euro, duke iu afruar niveleve të arkëtimeve të udhëtimeve para pandemisë. Në veçanti, sipas të dhënave zyrtare të publikuara, në periudhën janar – tetor 2022, trafiku i udhëtimeve hyrëse regjistroi një nivel prej 92.1% krahasuar me të njëjtën periudhë të vitit 2021. Në mënyrë të detajuar, trafiku i udhëtimeve nëpër aeroporte u rrit me 84.7% , ndërsa ai përmes stacioneve rrugore me 135.8%. Flukset turistike nga vendet e BE-së arritën në 16.337 milionë udhëtarë, duke shënuar një rritje prej 68.9% krahasuar me periudhën korresponduese të vitit 2021, ndërsa trafiku i udhëtimeve nga vendet jashtë BE-së u rrit me 147% në 10.105 milionë udhëtarë. Trafiku i udhëtimeve nga vendet e eurozonës u rrit me 59.3% dhe ai nga vendet evropiane jashtë zonës së euros me 94.2%.
Trafiku i udhëtimeve nga Gjermania u rrit me 47.1% në 4.241 milionë udhëtarë dhe nga Franca u rrit me 49.9% në 1.711 milionë udhëtarë. Numri i turistëve nga Britania e Madhe është rritur me 194.4% në 4.371 milionë udhëtarë dhe nga SHBA me 167.5% në 975.7 mijë udhëtarë. Së fundi, trafiku i udhëtimeve nga Rusia u ul me 63.3% dhe arriti në 34.6 mijë udhëtarë.
Krahasuar me vitin e kaluar para pandemisë, faturat e udhëtimeve në dhjetëmujorin e parë të këtij viti shënuan një rënie prej 2.6% krahasuar me periudhën korresponduese të 2019-ës, ndërsa trafiku i udhëtimeve në hyrje rezulton të jetë ulur me 11%.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.