Greva masive për rritjen e pages në Gjermani – Inflacioni në rritje ka prekur standardin e jetesës së punëtorëve

Një grevë masive në Gjermani ka nisur të hënën, duke dëmtuar transportin publik dhe aeroportet në një nga protestat më të mëdha në dekada, ndërsa ekonomia më e madhe e Europës po tërhiqet nga rritja e inflacionit.

Krerët e sindikatave paralajmëruan se rritja e konsiderueshme e pagave ishte një “çështje mbijetese” për mijëra punëtorë. Këto greva janë të fundit në rrjedhë kronologjike që kanë goditur ekonomitë e mëdha europiane, pasi çmimet më të larta të ushqimit dhe energjisë po prekin standardet e jetesës.

Gjermania, e cila ishte shumë e varur nga Rusia për gazin përpara luftës në Ukrainë, është goditur veçanërisht rëndë nga inflacioni më i lartë teksa po përpiqej për burime të reja energjie, me normat e inflacionit që tejkalojnë mesataren e eurozonës në muajt e fundit.

Çmimet e konsumit në Gjermani u rritën më shumë se sa pritej në shkurt, deri në 9.3% krahasuar me një vit më pare, duke treguar se nuk do të ndaleshin presionet e çmimeve që Banka Qendrore Europiane është përpjekur të zbusë me një sërë rritjesh të normave të interesit. Ka qenë një rregullim i dhimbshëm për miliona punëtorë në të gjithë vendin pasi kostot e gjithçkaje, rriten pas vitesh me çmime mjaft të qëndrueshme.

Sindikata “Verdi” po negocion në emër të rreth 2.5 milionë punonjësve në sektorin publik, duke përfshirë transportin publik dhe aeroportet. Sindikata e hekurudhave dhe transportit EVG negocion për rreth 230,000 punonjës në operatorin hekurudhor Deutsche Bahn dhe kompanitë e autobusëve.

Verdi po kërkon një rritje pagash prej 10.5%, që do të ishte një shtesë me të paktën 500 euro në muaj, ndërsa EVG kërkon një rritje prej 12%, ose të paktën 650 euro në muaj.

Dorina Kurtaj/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.