Hajdutet boshatisin muzeun gjerman – 450 monedha ari me vlerë ‘disa milionë euro’ grabiten nga objekti

Hajdutët kanë vjedhur një grumbull monedhash kelte me vlerë disa milionë euro nga një muze gjerman pasi me sa duket kanë ndërprerë lidhjet lokale të telefonit dhe internetit.

Punonjësit në muzeun në Manching zbuluan të martën se një “vitrinë ishte thyer” dhe koleksioni i 450 monedhave ishte vjedhur, tha policia lokale për AFP.

Hetuesit nuk dhanë detaje të tjera në lidhje me rrethanat e grabitjes, por zyrtarët lokalë theksuan një ndërprerje në shërbimet telefonike dhe të internetit.

“Ata prenë të gjithë Manching,” tha kryetari i bashkisë, Herbert Nerb për Sueddeutsche Zeitung. “Muzeu është në fakt një vend me siguri të lartë. Por të gjitha lidhjet me policinë u ndërprenë.”

“Profesionistët ishin në punë këtu,” shtoi Nerb. Zhdukja e thesarit ishte një “katastrofë e plotë” për qytetin bavarez, tha ai.

Koleksioni i monedhave të arit ka qenë një pikë kryesore e muzeut kelt dhe romak në Manching. Të zbuluara në vitin 1999, monedhat datojnë në shekullin e tretë para Krishtit dhe kanë një vlerë prej “disa milionë euro”, sipas policisë.

“Humbja e thesarit kelt është një fatkeqësi,” i tha agjencisë gjermane të lajmeve dpa ministri i shkencës dhe arteve i Bavarisë, Markus Blume. “Si një testament për historinë tonë, monedhat e arit janë të pazëvendësueshme.”

Vjedhja e monedhave është e fundit në një seri grabitjesh të profilit të lartë në muze në Gjermani.

Në një tjetër grabitje numizmatike, “gjethi i madh i panjeve”, e konsideruar si monedha e dytë më e madhe e arit në botë, u rrëmbye nga muzeu prestigjioz Bode i Berlinit në vitin 2017.

Hajdutët morën gjithashtu 21 bizhuteri dhe sende të tjera me vlerë në një bastisje natën në muzeun Green Vault në Pallatin Mbretëror të Dresdenit në nëntor 2019.

Autoritetet besojnë se anëtarët e një familjeje famëkeqe kriminale e kryen atë grabitje. Nuk ka mbetur asnjë gjurmë nga bizhuteritë, të cilat përfshijnë një shpatë me një dorezë të mbështjellë me diamant dhe një copë mbrojtëse për shpatullat që përmban një diamant të bardhë 49 karatësh.

Ekspertët e sigurimeve thanë se objektet e Green Vault kishte vlerë 113.8 milionë euro, me mediat gjermane që e quajtën atë grabitjen më të madhe të artit në historinë moderne.

N.Xh/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.