Hungarisë i “shterojnë” karburantet – Situata është kritike pasi kompanitë e huaja kanë ulur dërgesat

Situata e furnizimit me karburant në Hungari është “kritike” pasi kërkesa është rritur dhe blerjet në mes të panikut kanë çuar në mungesa, tha të martën grupi i naftës dhe gazit MOL, duke shtuar se zgjidhja e vetme ishte krijimi i kushteve për rritjen e importeve.

Kompanitë e huaja kanë ulur dërgesat e karburantit në Hungari që kur qeveria vendosi kufizimin e çmimit të benzinës dhe naftës në 480 forintë (1,22 dollarë) për litër një vit më parë.

“MOL mbetet e përkushtuar për të ruajtur sigurinë e furnizimit nga produktet tona, megjithatë furnizimi i plotë i tregut nuk mund të sigurohet pa rritjen e importeve të produkteve në mjedisin aktual,” tha kompania në një deklaratë.

Drejtori menaxherial i MOL, Gyorgy Bacsa, theksoi se kompania po përpiqej të importonte më shumë produkte nga rafineria e saj në Sllovaki, por ka arritur kufijtë maksimalë të kapaciteteve logjistike.

Kompania tha të hënën se u përball me disa mungesë të stoqeve të karburantit në pothuajse të gjithë rrjetin e saj të stacioneve të karburantit gjatë fundjavës pasi shumë njerëz filluan blerjet nën panik.

Kufiri i çmimit të karburantit aktualisht zbatohet për drejtuesit e automjeteve private, automjeteve bujqësore dhe taksive dhe skadon në fund të dhjetorit. Ndërsa, qeveria ka deklaruar se do të vendosë nëse do të zgjasë masën bazuar në informacionin që kompania është në gjendje të sigurojë furnizimin ose jo.

MOL tha gjithashtu se kishte filluar të rrisë përpunimin e naftës së papërpunuar në rafinerinë e saj të Danubit dhe pritet të arrijë shfrytëzimin e plotë të kapacitetit brenda dy javësh. Për shkak të punimeve të mirëmbajtjes, rafineria ka funksionuar me kapacitet 50-55%, duke prekur të gjitha produktet.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.