India propozon uljen e borxheve për vendet e G20 – Në ndihmë të vendeve anëtare të goditura nga pandemia dhe lufta

India po harton një propozim për anëtarët e G20-ës për të ndihmuar vendet debitore të goditura keq nga pasojat ekonomike të pandemisë së Covid 19 dhe luftës në Ukrainë. Kjo duke iu kërkuar huadhënësve, përfshirë Kinën, kreditorin më të madh sovran në botë, një ulje të konsiderueshme të borxhit.

Dy burime të qeverisë indiane konfirmuan propozimin, ndërsa ministrat e financave dhe shefat e bankave qendrore nga Grupi i 20 vendeve anëtare përgatiteshin të takoheshin në Bengaluru javën e ardhshme. Mbledhja do të jetë ngjarja e parë e madhe e presidencës njëvjeçare të Indisë të G20-ës, një bllok i përbërë nga ekonomitë më të mëdha në botë.

Fondi Monetar Ndërkombëtar tha se do të zhvillojë një takim virtual me Bankën Botërore, Indinë, Kinën, Arabinë Saudite, Shtetet e Bashkuara të Amerikës dhe demokracitë e tjera të pasura të G7 – ës këtë të premte. Objektivi është arritja e mirëkuptimit mbi standardet e përbashkëta, parimet dhe përkufizimet për mënyrën e ristrukturimit të borxheve të vendeve në situatë të vështirë.

Kina dhe vendet e tjera të G20 – ës ishin të vetëdijshëm se India po punonte për një propozim të tillë, sipas Reuters. Zyrtarët e Thesarit të SHBA janë shprehur më parë kundër kërkesës së Kinës që bankat shumëpalëshe të zhvillimit të vendosin për shkurtime të principalit të borxhit në çdo ristrukturim.

Dy nga vendet fqinje të Indisë, Pakistani dhe Sri Lanka, janë në krizë ekonomike dhe kërkojnë urgjentisht ndihmë ndërkombëtare para se të mbeten pa valutë për të paguar importet jetike. India dhe Klubi i kreditorëve të Parisit kohët e fundit i thanë FMN-së se mbështesin planin e ristrukturimit të borxhit të Sri Lankës pasi vendi i falimentuar kërkonte një hua prej 2.9 miliardë dollarësh. Shtetet e Bashkuara thanë në fillim të këtij muaji se ishin të gatshme të bënin gjithashtu pjesën e tyre, por fillimisht duheshin garanci të besueshme dhe specifike se Kina do të përmbushë standardin e FMN-së për lehtësimin e borxhit.

Banka e Eksport – Importit të Kinës i ka ofruar Sri Lankës një moratorium dy-vjeçar mbi borxhin e saj dhe tha se do të mbështesë përpjekjet e vendit për të siguruar një program të FMN-së, që një burim i qeverisë Sri Lanka tha se nuk ishte i mjaftueshëm.

FMN, Banka Botërore dhe Shtetet e Bashkuara ushtrojnë presion që i ashtuquajturi Kuadri i Përbashkët – një iniciativë e G20 – ës që u lançua në vitin 2020 për të ndihmuar vendet e varfra të vonojnë shlyerjen e borxhit – të zgjerohet për të përfshirë vendet me të ardhura të mesme, por Kina ka refuzuar deri tani.

Në dhjetor, presidenti i Bankës Botërore David Malpass tha se vendet më të varfra në botë u detyrohen 62 miliardë dollarë shpenzime në formën e shërbimit të borxhit vjetor kreditorëve dypalësh, një rritje prej 35% nga viti në vit, duke shkaktuar rrezik më të lartë të mospagimit.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.