Inflacioni mbetet i lartë nga qumështi e vezët – Bien presionet nga jashtë mbi çmimet, por qëndrojnë të forta nga tregu i brendshëm

Pas një rritjeje progresive në harkun kohor të një viti, inflacioni shënoi për herë të parë rënie gjatë muajve nëntor-dhjetor të vitit që sapo lamë pas. Nga Banka e Shqipërisë, ky zhvillim u përkufizua pikë kthese sa i përket ecurisë së ccmimeve, madje përtej pritshmërive më pozitive, por cilët janë faktorët që sollën këtë rënie, dhe gjithashtu, cilët janë faktorët që bëjnë presion në kahun e kundërt.

Sipas Bankës së Shqipërisë, ngadalësimi i fortë i çmimeve të naftës dhe rënia e kostove të transportit të mallrave zbutën presionin mbi çmimet në terma globalë, duke u reflektuar edhe në ekonominë shqiptare.  Lehtësim që po kundërbalancohet nga presionet e brendëshme mbi çmimet, veccanërisht ato të bulmeteve dhe vezëve.

Grupi Qumësht, djathë dhe vezë është edhe fajtori kryesor i ccmimeve të larta me të cilat vijojnë të përballen ende qytetarët shqiptarë. Ne inflacionin vjetor të vitit që sapo lamë pas ato zënë 24% të kontibutit, në një kohë që ulje të ndjeshme kanë shënuar karburantet duke zënë vetëm 17.3% të peshës së përgjithëshme.

Sipas të dhënave të Bankës së Shqipërisë, Inflacioni vjetor në tremujorin e katërt vijoi të përcaktohet në mënyrë të konsiderueshme nga kategoria “Ushqime të përpunuara” (43%). Brenda kësaj kategorie vihet re një ngadalësim i përgjithshëm i nënkategorive të saj, me përjashtim të nënkategorisë “qumësht, djathë dhe vezë” e cila vijoi të demonstrojë rritje të çmimeve. Kategoria “Ushqime të papërpunuara” dha kontribut më të lartë se një tremujor më parë, por duke rritur inflacionin total me vetëm 0.1 pikë përqindjeje. Nëngrupet “fruta” dhe “perime” demonstruan prirje rënëse të kontributeve në muajin dhjetor, duke lehtësuar presionet që vijnë nga kërkesa e rritur për mallra të kësaj kategorie në këtë muaj të vitit.

Kontributi i kategorisë “Mallra joushqimore” rezultoi -0.3 pikë përqindje më i ulët se në tremujorin paraardhës. Ky zhvillim ishte më i spikatur në muajin dhjetor, duke pasqyruar ngadalësimin e ndjeshëm të ritmeve rritëse të çmimeve të lëndëve të para, kombinuar me efektet nga nënçmimi i dollarit amerikan në tregjet ndërkombëtare dhe në atë të brendshëm valutor.

Çmimet e komponentëve të tjerë më të qëndrueshëm të inflacionit, ku përfshihen kategoritë “Shërbime, strehim dhe mallra”, rezultuan thuajse në të njëjtën vlerë të kontributit në formimin e inflacionit, krahasuar me një tremujor më parë.

Kategoria “strehim” vijoi prirjen rritëse, duke përcjellë edhe presionet e larta nga çmimet e ndërtimeve. Ndërkohë, kategoria “shërbime” regjistroi rënie të kontributit, kryesisht për shkak të çmimeve më të ulëta të paketave turistike.

Krahas tyre, edhe çmimet në nënkategorinë “hotele, kafene dhe restorante”, shënuan një ngadalësim të lehtë, veçanërisht në muajin dhjetor. Kategoria e mallrave dhe e shërbimeve me “çmime të rregulluara” ruajti kontributet e neglizhueshme në formimin e inflacionit total të tremujorit në analizë.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.