Inflacioni në vendet e OECD arriti 9.2% – Një rënie e lehtë në krahasim me muajin dhjetor
Në vendet e OECD-së në janar 2023, inflacioni u regjistrua 9.2%, kundrejt 9.4% një muaj më parë. Rënia e inflacionit, specifikon OECD, u regjistrua midis dhjetorit 2022 dhe janarit 2023 në gjysmën e vendeve që aderojnë në organin parizien, kundrejt dy të tretave midis nëntorit dhe dhjetorit.
Normat më të larta janë raportuar në Hungari, Letoni, Lituani dhe Turqi – mbi 20% për vendet e lartpërmendura. Pas kulmit të vërejtur në qershor 2022, inflacioni i çmimit të energjisë ka vazhduar gjithashtu të bjerë në vendet e OECD-së, ndonëse me një ritëm më të ngadaltë se muaji i kaluar, saktëson organizata.
Inflacioni i energjisë arriti në 16.4% në janar 2023, niveli më i ulët që nga marsi 2021, pas 18.2% në dhjetor. Rënia e inflacionit të energjisë, sqaron OECD, është pjesërisht për shkak të ndryshimit të politikave të fiksimit të çmimeve të energjisë në Holandë – vendosja e një tavani për çmimet e energjisë, dhe në Itali si pasojë e uljes së çmimeve të rregulluara të produkteve të energjisë. Inflacioni i çmimeve të ushqimeve ra gjithashtu, në 15.2% në janar, pas 15.6% në dhjetor në OECD.
Megjithatë, sipas organizatës pariziene, inflacioni i ushqimeve dhe energjisë vazhdon të përfaqësojë “nxitësit kryesorë të inflacionit në Francë, Itali dhe Japoni”. Në eurozonë, inflacioni ra në 8.7% në janar kundrejt 9.2% në dhjetor. Në vendet e G20 – ës, megjithatë, shifra mbeti në thelb e qëndrueshme, në 8.4%.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.